La FSA afita la so postura de nun abrir agora'l procesu de reforma del Estatutu pa la oficialidá

El voceru de grupu parllamentariu, Marcelino Marcos, confirmó que nun va sofitar la iniciativa de Podemos y IX el vienres na Xunta Xeneral, polo qu'ésta va morrer ehí.

Como yera previsible, y anunciara en delles ocasiones, la FSA retrasa a la llexislatura próxima'l so sofitu a la oficialidá, polo que namái 14 diputaos, los de les dos formaciones que presentaron la propuesta de modificación de reforma del Estatutu d’Autonomía pa incluyir la oficialidá del asturianu y del gallego-asturiano nel so ámbitu territorial, van votar a favor. P'abrir el procesu ye necesaria la mayoría absoluta de la Cámara, esto ye, 23 parllamentarios.

Marcos argumentó ayeri tres la Xunta de Voceros que nun da tiempu a tramitar la reforma del Estatutu nesta llexislatura y acusó a Podemos y Izquierda Xunida (IX) d'actuar con "frivolidá" nesti asuntu. D'igual forma recordó que la oficialidá nun taba recoyida nel programa eleutoral de la FSA, polo que'l grupu parllamentariu pretende ser respetuosu con esi compromisu colos eleutores, asina como col mandáu del congresu socialista qu'aprobó la defensa de la oficialidá, posición que se va incluyir ente les propuestes pa les Nacionales de mayu.

Enrique López Hernández, voceru de Podemos, apuntó que "oficializar l'asturianu nun va contra naide, ye reconocer un derechu, y el propiu partíu que sustenta al Gobierno asturianu asina lo reconoció nel so congresu últimu", pa depués afirmar que "votar en contra ye votar a favor de Pablo Casado". Mentes, Gaspar Llamazares, d'IX, señaló que "llamentamos que la posición mayoritaria de la FSA nun sía operativa nel grupu parllamentariu y na Xunta Xeneral, y nun teníemos otra alternativa que propone-y a la Cámara una propuesta programática sobre la futura cooficialidá qu'esperamos, que de nun ser nesta ocasión, sí sía un fechu nel primer periodu de sesiones de la futura Xunta Xeneral".

Na imaxe Marcos, primeru pela la izquierda, nos momentos previos a la reunión con Podemos pa negociar los presupuestos pal 2019. Semeya obra d'Armando Álvarez.