Les condiciones d'accesu a les policíes llocales van ser idéntiques nel 2019

El decretu que les afita va entrar en vigor nel primer trimestre del añu qu'entra.

La Comisión de Coordinación de Policíes Llocales dio ayeri lluz verde al documentu qu'establez los requisitos pal accesu común a estos cuerpos y a los procedimientos de movilidá xeográfica de los axentes. La normativa, que tien el sofitu de la Federación Asturiana de Conceyos (FACC) y los sindicatos del sector, representaos na comisión, supón el primer desenvolvimientu de la Llei del Principáu d’Asturies 2/2007, del 23 de marzu, de Coordinación de les Policíes Llocales, y va dexar unificar tolos procesos de seleición y movilidá, col aforru económicu consiguiente pa los conceyos, que van evitar el pagu de tases y van entamar los procesos pente medies de convenios col Executivu.

El Gobiernu satisfái asina les demandes de sindicatos y conceyos pa que tolos cuerpos policiales d’ámbitu llocal tengan los mesmos criterios d’accesu, evítense les disfunciones y favorezse la movilidá xeográfica de los profesionales. Un grupu de trabayu adscritu a la comisión de coordinación foi l’encargáu de perfilar el proyeutu nos meses últimos.

La xunificación busca homoxeneizar los procesos selectivos y establecer un únicu temariu, amás de garantizar la oxetividá y la igualdá de condiciones d’accesu de los aspirantes, ameyorando asina la eficacia y facilitando el llabor de los conceyos. El decretu determina que’l sistema d’accesu va ser pente medies d’oposición y define’l conteníu mínimu de les bases de cada convocatoria, los requisitos pa presentase y la composición del tribunal calificador, que va tar formáu por un presidente, cuatro vocales y un secretariu.

La prueba

El procesu selectivu va constar de dos fases: la primera d’oposición, con un test de conocimientos, pruebes físiques y d’aptitú psicosocial y un reconocimientu médicu, y otra d’ingresu pa los que superen el procesu anterior. Los candidatos que lleguen a la segunda fase van ser nomaos funcionarios en práutiques y han realizar un cursu selectivu de formación na Escuela de Seguridá Pública.

Si saquen un resultáu favorable, van ser nomaos funcionarios de carrera y van tomar posesión de la so plaza como emplegaos públicos. Aquellos que nun lo llogren por faltar a más del 15 por cientu de les hores llectives van poder incorporase al cursu siguiente y, si nun lu superen, van perder el derechu al so nomamientu como funcionarios de carrera.

Otra manera, el decretu tamién busca homoxeneizar los uniformes, medios téunicos y de defensa de tolos cuerpos de seguranza d’ámbitu llocal. La norma quier promover una mayor operatividá y eficacia de les policíes llocales, facilitando la xestión de los conceyos y cumpliendo cola función de coordinación de los axentes que tien asignada l’Alministración.

Na semeya, Guillermo Martínez Suárez, conseyeru de Presidencia y Participación Ciudadana, na Comisión de Coordinación de Policíes Llocales.