COAG denuncia l'afondamientu de la crisis nel campu asturianu nel 2006

"Dientro de la riestra d'análisis y balances sobre l'añu, el sindicatu agrariu COAG-Asturies valoró l'añu 2006 como ""mui negativu"" pal campu asturianu. Nel so balance, rescampla que los los costes de producción xubieron esponencialmente a lo llargo del 2006 mientres los precios de los productos agrarios baxaron en picao. En consecuencia, COAG diz que'l pieslle d'esplotaciones foi una consecuencia inevitable en viendo que los númberos ""nun cuadraben"".

El sector llecheru ye onde COAG ve un panorama más murniu, sorrayando la contradicción ente les inversiones que tán faciendo los ganaderos y l'allancamientu del preciu del lleche, que denuncia que ta pagándose al mesmu preciu que va venti años. COAG valora los 466 abandonos d'esplotación rexistraos na última campaña como ""esmolecedores"" sobremanera pola ""falta de sensibilidá de l'alministración asturiana énte una situación que va llevar a la desapaición del sector"" echándo-y la culpa de la mala xestión del plan llecheru.

La xuba del gasóleu, de los fertilizantes o los piensos y los costes que vienen del cumplimientu de les normatives, cada vegada más estrictes de protección mediuambiental o seguridá llaboral suponen, al paecer d'esti sindicatu del campu, una xuba de costes en toles estayes de l'agricultura y la ganadería que comprometen el futuru del sector, polo que-y pide al Gobiernu asturianu que faiga ""un apueste pol campu asturianu, con midíes que garanticen el caltenimientu de l'actividá agraria y del texíu rural asturianu""."