Reinerio Álvarez Saavedra afirma qu’hai que dir a una redacción “más ambiciosa” del artículu cuartu del Estatutu

"El secretariu Xeneral del Partíu Popular d'Asturies, Reinerio Álvarez Saavedra, encabezó una delegación del Partíu Popular que visitó ayeri la esposición d'artistes asturianos pola oficialidá qu'organiza la plataforma Conceyu Abiertu Pola Oficialidá. Con motivu d'esta visita, los representantes de la segunda formación política asturiana dieron a los medios de comunicación la so visión sobre la situación actual de la política llingüística n'Asturies y les posibilidaes que s'abren pal asturianu con motivu de la reforma del estatutu d'autonomía, un estatutu nel que Reinerio Álvarez Saavedra cree que ye preciso dir a ""una redacción más ambiciosa del artículu cuartu del estatutu"" venceyada amás a una reforma de la Llei d'Usu del Asturianu, llei que pal líder popular ""foi válida nel so momentu y que supunxo l'únicu avance real pal asturianu nel terrén llegal pero que ye preciso actualizar"".

Acompañáu pola candidata popular a l'alcaldía de Xixón Pilar Fernández Pardo, la diputada autonómica Cristina Coto, el conceyal por Xixón Manuel Pecharromán y el presidente del PP de Cangas del Narcea, Manuel Rodríguez Blanco, Álvarez Saavedra afitó asina la so postura y la del PP énte la reforma estatutaria, na que quier que se ""solucione'l conflictu que se vive cola llingua dende va más de trenta años n'Asturies"". Anque ensin facer mención a la oficialidá de manera esplícita, Saavedra adelantó que, nel marcu de les reuniones col CAO, el PP llegó a un puntu mínimu de común que pasa pela defensa de polítiques de fomentu del asturianu. Saavedra esplicó la idea de visitar la esposición vieno precisamente del convite que fixeron los representantes el CAO nuna de les últimes reuniones ente'l PP y esta plataforma cívica a la que'l popular dixo ""apoyar"" dientro de la llinia del PP d'apertura a tolos colectivos sociales"". Reinerio Álvarez Saavedra definió'l diálogu entamáu ente CAO y PP como ""un intercambiu honestu y lleal de puntos de vista"" esplicando que'l CAO tien accesu a los documentos internos del partíu sobre cuestiones llingüístiques, especialmente con contándose col so paecer con vistes a la redacción del programa electoral del PP pa mayu del 2007.

Pela so parte, la presidenta del PP de Xixón y candidata a l'alcaldía de la ciudá Pilar Fernández Pardo, que tuvo palabres d'apoyu a la esposición y afitó el ""respaldu del PP a la llingua"", faló sobre les últimes polémiques alredor del asturianu na Villa de Xovellanos, centrándose na dimisión la selmana pasada del Conseyu Asesor de la Oficina de la Llingua. Pardo declaró que la dimisión en bloque d'esti organismu abultába-y ""comprensible y xustificada"" énte ""l'incumplimientu de PSOE y IX na cuestión de les ordenances d'usu del asturianu"" un documentu qu'aseguró que nunca-y presentare l'equipu de gobiernu na ciudá.

N'acabando d'atender a los medios de comunicación, los dirixentes populares siguieron cola visita a la esposición, guiada polos comentarios del artista Ánxel Nava."