Entama’l derribu de la térmica d’Avilés

"Nun hai salvación pal monumentu industrial avilsín. Les pales y los operarios tan entamando a retirar equipos y facer llabores de preparación pal derribu del históricu edificiu qu'agospió la central térmica d'Ensidesa n'Avilés dende los años 50 del sieglu pasáu. La selmana qu'entra, la empresa Lezama S.A., encargada del llabor de derribu, cuenta con tener una máquina especial pa valtar les muries de la térmica, a la que nin la movilización cívica, nin los encamientos d'instituciones internacionales como'l comité asesor de la UNESCO n'España llograron caltener.

L'ayalga del patrimoniu industrial asturianu venceyáu a la gran siderurxa del franquismu llega asina a un final pal que nadie contaba va namás dos años y mediu, cuando la conseyera de cultura Ana Rosa Migoya recorría l'edificiu pa dar anuncia de la instalación nel mesmu d'un gran equipamientu cultural pal que llegó a convocase un concursu d'idees. La llegada de proyectos industriales como'l grupu eléctricu a gas de ciclu combináu que proponía la empresa Isastur nel sitiu de la vieya térmica punxo un primer puntu de dulda nes intenciones pal históricu edificiu, pero foi cola apaición pública del proyectu del Centru Cultural Niemeyer pa la Ría d'Avilés que la térmica desapeció de l'axenda del executivu asturianu y del mesmu equipu de gobiernu d'Avilés, que pasaron de defender el futuru de la térmica a condenala a un ""via crucis"" alministrativu que remata agora col so derribu. L'últimu actu del mesmu foi la celebración d'un plenu especial en conceyu d'Avilés la selmana pasada sobre de la térmica nel que la mayoría de doce votos de PSOE y IX-BA contra los 10 de PP y ASIA roblaron el destín de la térmica de Valliniello."