L'Uviéu pieslla con éxitu la so ampliación de capital

El Real Uviéu SAD completó l'ampliación de capital d'un millón d'euros que tenía abierta cola venta de tolos 36.364 títulos puestos en circulación. A la fin, y dempués del intentu por parte del empresariu alicantín de la construcción Francisco Gómez por facese cola mayoría nel club, la mayor parte de l'ampliación de capital del históricu del fútbol asturianu foi pa la sociedá Control Sport Siglo XXII, que preside l'asturianu Alberto González, tamién dirixente del equipu de balonmano Lacera Naranco y que mercó más de 800.000 euros n'acciones azules. Nun comunicáu emitíu darréu de mercar les acciones de l'ampliación, la plataforma Control Sport Siglo XXII aclaria que tolos sos miembros son asturianos, afita'l so uviesmu y asegura que nun tien rellación nin tratu nengún con Celso González, accionista mayoritariu históricu del club.

Dempués d'esta ampliación, el capital social del Real Uviéu ye de 2.666.785 euros, siendo los principales accionistes de la entidá Control Sport Siglo XII con 800.250 euros (29% del capital del club) Celso González, que controla 660.000 euros (24,75%) Eugenio Prieto con 138.000 euros (5,14%) Francisco Gómez, con 48.950 euros (1,96%) Luciano Huelga, con 48.000 euros (1,8%) y Miguel Moro, con 30.000 euros (1,12%).