La Xunta Pola Defensa de la Llingua da-y el premiu Andrés Solar 2006 al grupu Felpeyu

"El ""Pegollu"" de los Premios Andrés Solar, col que la organización Xunta Pola Defensa de la Llingua Asturiana reconoz tolos años a les persones y entidaes que más destacaren pol so llabor positivu en favor de la llingua asturiana va dir na so edición 2006 pa los componentes del grupu de folk Felpeyu, que sufrieren el pasáu mes de xunu un accidente de tráficu nel que perdieron la vida dos de los sos componentes, Igor Medio y Carlos Redondo.

L'acta del premiu esplica qu'esti Pegollu del Andrés Solar quier ser ""reflexu y homenaxe a tol colectivu musical d'Asturies qu'usa l'asturianu y que lleva bien d'años amosando'l so compromisu cola defensa de la llingua asturiana"" y ""faciendo un llabor fundamental pa la normalización de la llingua asturiana"". La Xunta sorraya tamién el ""compromisu claru cola reivindicación llingüística qu'asumió siempre'l grupu Felpeyu, y la so disponibilidá militante pa collaborar y respaldar les campañes entamaes pola Xunta pola Defensa de la Llingua Asturiana"".

D'otra manera, la versión negativa del Andrés Solar, el ""Madreñazu"" que ""premia"" a quien ""destacare vergonzosamente pola so actitú contraria y irrespetuosa pa colos derechos llingüísticos de les persones falantes d'asturianu"" va dir al actual presidente del Gobiernu asturianu, Vicente Alberto Álvarez Areces, al que la Xunta identifica como ""responsable d'una trayectoria llamentable de despreciu y agresión constante al nuestru patrimoniu llingüísticu y a los derechos de les persones falantes d'asturianu"" premiándolu ""pola so actitú represiva y antidemocrática pa coles persones implicaes na defensa de la llingua asturiana"".

La ceremonia d'entrega de los Premios Andrés Solar va facese nel Salón d'Actos del Antiguu Institutu Xovellanos de Xixón, el sábadu 20 de xineru de 2007."