Les tarifes del abonu mozu tendrán precios más ventayosos

Baxarán ente un 8 y un 52,5 por cientu.

El conseyu d'alministración del Consorciu de Tresportes d'Asturies (CTA) trata güei l'aplicación de precios nuevos más ventayosos nel abonu mozu mensual, que fai posible viaxes ensin llende a los menores de 31 años, asina como meyores nos servicios de tresporte nocherniegu interurbanu. El costu del abonu baxará de preciu a partir del 1 de xineru del 2019, con descuentos que se muevan ente'l 8 y el 52,5 por cientu al respeutive del actual, en función de les distancies, distribuyíes n'ocho zones.

Amás, simplificaránse les tarifes, igualando les de los usuarios que se mueven per una o dos zones, que pasarán a pagar 37 euros al mes con independencia del númberu de desplazamientos. Aquellos que lo faen per hasta cuatro zones abonarán 65, mentes que pa los d'a partir de cinco l'abonu tendrá un costu máximu de 100 euros mensuales.

Antiguu abonu universitariu

Na primavera del 2017 l'antiguu abonu universitariu tresformóse nel abonu mozu, de manera tala que les sos ventayes estendiéronse a un coleutivu d'hasta 200.000 usuarios potenciales. Tres les xuntes celebraes con representantes de la mocedá asturiana, nes que se punxo de manifiestu la bona acoyida d'esti cambiu, el CTA decidió realizar un esfuerciu suplementariu p’ameyorar les tarifes, sobre manera nos desplazamientos más habituales, que son los susceptibles de facese con abonos mensuales ensin tope.

Per otra parte, el consorciu va analizar los servicios d'autobuses nocherniegos interurbanos más demandaos y ampliará la rede actual. Nel 2017 hebo más de 152.000 usuarios, con 10 servicios fixos y 19 más habilitaos en fiestes puntuales, siendo'l que más viaxeros tresportó'l que comunica Villa con La Pola Llaviana, con más de 27.400 usuarios nel añu últimu, siguíu del Uviéu-Xixón (24.600) y el Corvera-Avilés-Castrillón (20.300).