La Xunta pola Llinga diz que se pierden partíes presupuestaries pola falta de proteición llegal del asturianu

"La Xunta pola Defensa de la Llingua Asturiana calificó d'alderique ""falsu y interesáu"" la falta d'inclusión de la llingua na negociación de la financiación autonómica per parte del Gobiernu asturianu, y denunció les ""gravísimes declaraciones feches pola FSA"" nesti sen. ""La falta de protección llegal pal asturianu vuelve a dexalo fuera nuna oportunidá pa contar, como les demás llingues, con partíes presupuestaries específiques"", afirmó el voceru de la organización, Xulio Casado.

Pal representante d'esti colectivu ""l'asturianu ye una llingua viva claramente discriminada que cuenta con un apoyu social bultable y que vive nuna situación total d'abandonu poles alministraciones públiques"". Dende'l so puntu de vista, ""les declaraciones feches por Javier Fernández y l'actitú que caltién el Gobiernu asturianu namás se puen entender dende'l puntu de vista de querer acabar col nuestru patrimoniu llinguísticu a mediu plazu"".

Acusó al Gobiernu socialista de ""facese'l sordu sistemáticamente a los informes del Conseyu d'Europa o a les voces que dende dientro y fuera d'Asturies reclamen que s'adopten unes midíes urxentes y firmes pa parar el desaniciu del idioma propiu d'Asturies, que ye la demostración clara d'ello"". ""Si nun se tomen estes midíes, al asturianu nun-y queden oportunidaes de vida como llingua d'usu común de los ciudadanos y ciudadanes"", afirmó.

Según Casado, n'Asturies ""contamos con un sistema educativu que nun garantiza los derechos de los estudiantes, especialmente na enseñanza secundaria y na Universidá; los avances en toponimia son la mayoría de les veces papel moyáu (nun hai más que ver la TPA pa dase cuenta); los ciudadanos siguen teniendo torgues a la hora d'espresase na so llingua cola alministración; la Llei d'Usu nun s'aplica na mayoría de los casos y, lo que ye peor, nin siquier se contempla nos planes del Executivu actual; pa más esmolecimientu, la FSA y el Partíu Popular siguen faciendo declaraciones onde sorrayen que l'asturianu nun va ser una llingua oficial enxamás, si d'ellos depende""."