Iglesias diz que "oxalá tuviéremos reconocida la oficialidá pa tener otru argumentu dende Asturies" na financiación

"El coordinador xeneral d'IX Asturies, Jesús Iglesias, afirmó güei que ""oxajá tuviéremos reconocida la oficialidá de la llingua asturiana, porque díbemos tener otru argumentu dende Asturies"", en referencia a la negociación del sistema de financiación. De la mesma manera, dixo que'l sistema tien de garantizar la suficiencia pal caltenimientu de los servicios públicos y les prestaciones sociales.

El dirixente d'IU, nuna rueda de prensa ofrecida n'Uviéu, sorrayó que la introducción de criterios sobre población, avieyamientu o espardimientu, son importantes, pero non definitivos. ""La clave que va determinar si'l modelu va tener recursos abando va ser l'emponderamientu de caún de los criterios"", señaló. ""Oxalá tuviéremos reconocida la oficialidá de la llingua asturiana, porque teníemos otru argumentu dende Asturies"", dixo.

Asina, sobre la posibilidá de que'l sistema contemple un fondu de converxencia, Iglesias dixo que cualquier fórmula ye bona siempre que se garanticen los recursos necesarios. ""Lo importante va ser cuando se pase de les lletres a los númberos"", espunxo.

Iglesias consideró que lo que de verdá refuerza a España nun ye tanto una bandera, un himnu o declaraciones ""patrioteres"", sinón el sentimientu de los ciudadanos de sentise apoyaos pol Estáu cuando recurren a los servicios públicos, de manera que tenga'l mesmu nivel de calidá que n'otros puntos de la xeografía nacional.

CRÍTIQUES AL PP

Entrugáu sobre les declaraciones del presidente del PP d'Asturies, Ovidio Sánchez, que solicitó güei la convocatoria d'un plenu estraordinariu pa unificar criterios en cuanto a la negociación del nuevu modelu de financiación, Iglesias foi críticu col dirixente 'popular' y recordó que fai poques feches el PP refugó na Xunta un alderique sobre l'asuntu que proponía IU.

Asina, dixo que la posición del PP sobre esti asuntu ye ""poco seria"" y demuestra la so ""falta de rigor"" nesti tema. Amás, señaló que'l PP venía apostando dende hai poco por una negociación a nivel estatal ente PSOE y PP. ""Dao lo poco que pinta Ovidio Sánchez nel PP nacional, mos fiamos más de lo que se puea negociar dende Asturies"", apuntó."