La collecha 2008 de sidra de mazana seleicionao va superar el millón de llitros

"La sidra de mazana seleicionao, sidra natural avalao por un certificáu de calidá, va superar el millón de llitros de producción na collecha del 2008. Esta sidra ta ellaborao con 20 variadaes de mazana autóctono por Sidra Trabanco, El Gobernador, Muñiz, La Nozala, Peñón y Foncueva.

Asina lo prevén estos seis llagaraes que participen nesta marca de calidá y que mayaron más de 1,5 millones de kilos de mazana collechao n'Asturies. D'esta manera, los llagareros esperen producir 1,12 millones de llitros de sidra d'esta collecha 2008. Esta cifra supera nun 12% la collecha del 2006, la última afeutada pola tradicional vecería. Sin embargu, ye un 44% inferior a la collecha 2007, un añu récor pa la sidra de Mazana Seleicionao, puesto que superaron los 2 millones de llitros.

Según indicó'l voceru de la sidra de Mazana Seleicionao, y xerente del Grupu Trabanco, Samauel Menéndez Trabanco, nos llagares tovía tán escedentes de la collecha 2007 y ye probable que lleguen hasta la primavera del añu 2009. De magar ehí, se comercializará yá pa primer sidra de nueva collecha.

A pesar de ser añu par y, poro, de vecería, los llagares realicen una balance satisfactoriu de la collecha d'esti añu. ""Recoyóse más mazana de lo que venía siendo habitual n'años de vecería y esto pue debese a qu'entamen a surdir efeutu los tratamientos fitosanitarios aplicaos polos agricultores pa evitar l'alternancia biañal y algamar colleches más regulares"", aseguró'l xerente de Sidra Muñiz, Manuel Riestra.

Amás de la cantidá, esta collecha 2008 apunta maneres en cuanto a la calidá, puesto que según esplicó'l xerente de La Nozala, Víctor Escalada, los pumares nun tuvieron tan cargaos como l'añu pasáu, cuando se dio una collecha récor. ""Gracies a ello, el frutu pudo potenciar les sos cualidaes y realmente s'apreció una calidá media superior a les mazanes mayaes nel 2007"", añadió.

Pela so parte, el xerente de Sidra El Gobernador, Francisco Martínez Sopeña, afirmó que'l clima tamién foi l'apropiao, puesto que les mazanes recibieron les hores xustes de sol y algamaron el so puntu óptimu de maduración."