El V Ochobre Folk de Mieres lleva les actividaes del sábadu al parque Xovellanos

El Grupu Folclóricu Prau Llerón pretende abrir asina esti certame a tolos mierenses.

Del vienres al domingu, Mieres va acoyer la quinta edición del Ochobre Folk. La principal novedá ye que'l festival, actu central de la folixa, pasa del Auditoriu de la Casa Cultura Teodoro Cuesta al parque Xovellanos, al igual que la mayoría d'eventos del sábadu.

Asina, dende les 18 hores van actuar nesti céntricu llugar de la villa Los Neños de Prau Llerón, Prau Llerón, l'ayerana Banda Gaites El Gumial y el gallegu Grupo de Baile e Música Tradicional Tahúme. Enantes tolos grupos van desfilar dende la cai La Vega hasta'l parque.

Alcuentru de Pandereteres

L'Ochobre Folk va comenzar el vienres a les 20 hores na plaza Requexu col II Alcuentru de Pandereteres. A les 23 hores va tener llugar el conciertu de Los Indianos de la Maleta al Agua.

Yá'l sábadu al meudía, nel Xovellanos, van entamase xuegos tradicionales y un pasucais con bandina tradicional. El III Campeonatu de Rana Ochobre Folk va principiar a les 12.30 hores y a les 13 hores los presentes van poder asistir a un taller de baille astur-gallegu.

Tres el festival, previstu pa les 18 hores, la folixa va treslladase al colexu Aniceto Sela. Ehí va celebrase a les 21.30 hores una espicha popular, con entraes a 12 euros de manera anticipada (nel chigre L'Abellugu o llamando al teléfonu 665.616.462) y a 15, na puerta.

Los asistentes van poder disfrutar del conciertu de les gallegues Tanxugueiras y depués va haber escenariu llibre. La folixa va finar pasaes les 2 hores tres una chicolatada y una danza prima.

El domingu, xornada final, la reciella va ser protagonista colos IV Alcuentros Infantiles col Folclor Ochobre Folk, programaos a les 13 hores na plaza d'El Requexu. Neñes y neños van participar con canción asturiana, baille o gaita y tambor.