Podemos y Izquierda Xunida aconceyen pa tratar una posible reforma del Estatutu

L'alcuentru va celebrase na tarde del martes na Xunta Xeneral tres la propuesta morada puesta enriba de la mesa la selmana pasada.

Podemos y Izquierda Xunida (IX) van celebrar un aconceyamientu a les 16.30 hores pa tratar una posible reforma del Estatutu d'Autonomía esta mesma llexislatura. La intención de la formación morada yera la d'abrir el procesu pa quitar los aforamientos, postura na que coincide con Ciudadanos, ensin refugar a incluyir la oficialidá –a lo que se negaba la formación naranxa– y ampliar competencies.

Esta primera posición foi refugada tanto pola Federación Socialista Asturiana (FSA) como por IX, apuntando Gaspar Llamazares la so "perplexidá" énte l'alcuerdu "contra natura" de Podemos y Ciudadanos. Un día depués, Andrés 'Ron' Fernández Vilanova ufría a la coalición la posibilidá d'abrir el procesu de reforma del Estatutu pa incluyir la oficialidá, pa lo que, aseguró, esistía sintonía cola direición d'IX.

Güei dambos partíos van tratar esti asuntu, qu'atopa la negativa de los socialistes por quedar siete meses de llexislatura. A ello hai que sumar la insistencia de la FSA d'incorporar la defensa de la oficialidá de cara a les eleiciones de mayu.