FSA y IX refuguen la propuesta de reforma del Estatutu plantegada por Podemos y Ciudadanos

Los socialistes califíquenla de "ocurrencia" y la coalición de "cortina de fumu".

Marcelino Marcos, voceru de la FSA na Xunta Xeneral, punxo per delantre l'actividá llexislativa énte la reforma del Estatutu d'Autonomía plantegada por Podemos y Ciudadanos pa quitar los aforamientos que, aseguró, los miembros del so grupu reciben "plasmaos". "¿Dalguien pue creer realmente que conociendo los tiempos necesarios pa la reforma del Estatutu y colo que queda de llexislatura se pue realizar una modificación d'esi Estatutu?", entrugó, pa depués destacar que "nin les dos formaciones polítiques comparten l'algame de la modificación del Estatutu d'Autonomía. Tamos asistiendo a un matrimoniu de conveniencia pa tener protagonismu nun asuntu nel que ye mui importante".

Ente les desavenencies ente Ciudadanos y Podemos Marcos citó la cooficialidá. "Ún plantega que quier dir col tema de la cooficialidá y los otros 'non, que nun tamos d'alcuerdu'", apuntó, al tiempu que calcó "que l'Estatutu nun se reforma en trés vegaes; refórmase una".

El socialista insistió en que "yá dexamos nidio hai meses escasos el posicionamientu respeuto al asturianu. Nós afrontaremos el tema de la cooficialidá pa la siguiente llexislatura cuando, nel próximo programa eleutoral, presentemos una propuesta política a los ciudadanos entes les que probablemente tea'l tema de la cooficialidá".

"Contra natura"

El grupu parllamentariu d'IX tamién amosó la so "perplexidá" énte l'alcuerdu "contra natura" de Podemos y Ciudadanos. "IX nun tien problema nengún, sinón al contrario, en rellación a la eliminación de los aforamientos, pero ta sorprendida porque se faiga una reforma dura del Estatutu pa una reforma parcial, cuando la reforma del Estatutu tien otres munches demandes: d'incorporación de derechos sociales, con respeuto a l'autonomía institucional de la comunidá autónoma y cola cultura asturiana y la llingua asturiana –la oficialidá–, entre otres".

Asina, el voceru Gaspar Llamazares califica la propuesta de reforma de "puramente ficticia, una cortina de fumu, una trampa eleutoral”, y añadió que "si mientres tola llexislatura'l Parllamentu reformó malpenes un par de lleis en trés años, ¿quién pue creer que vamos reformar l'Estatuto d'Autonomía en trés meses?".