Un trunfu nel Molinón punxo’l pieslle a un añu históricu pal Sporting

"L'Sporting de Xixón pieslla l'añu de la so vuelta a la máxima categoría del fútbol con un trunfu en casa frente al Almería. Nun partíu que nun va recordase pol bon xuegu de nengún de los dos equipos, los asturianos supieron ser prácticos amosando un mayor oficiu frente a un Almería con muncha voluntá pero con mui poco fútbol. Estos tres puntos asitien al Sporting nel puestu once con ventiún puntos. Hai que conseñar qu'otra vuelta una victoria de los xixoneses supunxo'l cese del entrenador rival.

Cola ausencia na portería y na defensa de la mayor parte de los titulares, l'Sporting entamó mui nerviosu defensivamente frente a un Almería que durante'l primer cuartu d'hora volcóse na portería local, que gracies a un bon trabayu de Sergio Sánchez quedó a cero. Pasáu esti primer arreón de los andaluces, l'Sporting fíxose dueñu del partíu, marcando'l primer y únicu gol nel minutu 27 gracies a un remate de cabeza de Maldonado tres un centru perfectu de Carmelo.

A partir del gol local el restu del partíu foi un intentu tres otru de los almerienses por averase a la portería asturiana abriendo'l xuegu, algo que quixo aprovechar l 'Sporting xugando al contrataque. Sicasí, nin un equipu nin otru fueron quién a mover el marcador hasta'l final.

Ficha técnica

Sporting: Sergio Sánchez, Sastre (Cámara m 46), Iván Hernández, Jorge, Canella, Matabuena, Michel, Luis Morán, Carmelo, Maldonado (Lora m 72), y Bilic (Barral m 86)

Almería: Diego Alves, Bruno, Carlos García, Acasiete, Mané, Juanito (Chico m 69), Julio Álvarez (Guilherme m 58), Juanma Ortíz (Solari m 65), Coronas, Piatti y Negredo.

Goles: 1-0 Maldonado (m 27)

Árbitru: Álvarez Izquierdo. Espulsó nel minutu 59 al entrenador del Sporting Manolo Preciado y sacó tarxeta amariella a Bruno (m 15), Carmelo (m 20), Michel (m 29), Maldonado (m 37), Matabuena (m 44), Corona (m 65) y Raúl Cámara (m 66)."