El PP exixe a la FSA que nun "seya cómpliz" d'un conceyal 'tránsfuga' y aparte a 'Allende' del Gobiernu de Piloña

"El secretariu xeneral del PP d'Asturies, Fernando Goñi, exixó güei a la direición de la Federación Socialista Asturiana (FSA-PSOE) que nun seya ""cómpliz"" d'un conceyal 'tránsfuga' y aparte al edil espulsáu d'Izquierda Asturiana (IAS), José Ángel García Fernández, 'Allende', del Gobiernu Municipal de Piloña.

Goñi realizó estes declaraciones tres la decisión de la Comisión 'Antitransfuguismu' d'unviar por falta d'acuerdu al comité d'espertos, qu'emite dictames que deben acatar los partíos, el casu de 'Allende', elixíu nes últimes elecciones por Izquierda Asturiana (IAS) y que dempués dio'l so apoyu pa que l'actual alcalde, el socialista Camilo Montes, gobernare nel Ayuntamientu. PP y IAS fueron les organizaciones que llevaron a la Comisión Antitransfuguismu el casu.

Goñi recordó que José Ángel García Fernández ye'l primer teniente d'alcalde del Gobiernu municipal, tien asignaes delles delegaciones y ta lliberáu. ""Tamos ante un conceyal que ye un 'tránsfuga' y si la FSA nun actúa ta beneficiándose d'un 'tránsfuga' pa gobernar en Piloña, polo qu'exiximos qu'adopte les midíes oportunes pa que dexe de tar lliberáu y pase a forma parte del grupu de conceyales ensin independientes"", espunxo Goñi.

Pal dirixente popular resulta ""imprescindible"" que la direición de la FSA actúe porque ""siempre se llenó la boca exixendo'l cumplimientu del Pactu 'antitransfuguismu' y ayeri na Comisón mostróse roceana a la hora de dicir quién yera'l beneficiariu d'un 'tránsfuga', y nun hai más beneficiariu nesti casu que l'alcalde socialista de Piloña.

Goñi insistió n'exixir responsabilidá a los socialistes, ""porque siempre falen d'ética y moralidá, de lo que debe facer el restu, y agora tóca-yos actuar igual qu'exixeron a los demás partíos"".

El secretariu xeneral del PP d'Asturies recordó que nes pasaes elecciones municipales el PP foi'l partíu más votáu con seis conceyales, mientres que'l PSOE algamó otros seis y Izquierda Asturina ún. Poro, insistió en que ""lo primero que se debe facer ye pasar esti conceyal al grupu d'indpendientes y de magar d'ehí va haber que tomar otres decisiones qu'afeuten a la gobernabilidá de Piloña""."