Un traxe de marineru y ún de llanisca del 1880 ganaron nel ‘Indumentaria’ nel marcu del Día’l Traxe’l País

David Fernández Fernández, con un traxe de marineru, y Laura Martínez García, con ún de gala del oriente, foron los ganadores de la tercer edición del concursu ‘Indumentaria’. Grau acoyó un añu más el Día’l Traxe’l País con un alta participación de persones con vistimienta tradicional ente'l públicu que s'averó a la villa.

El traxe vencedor en categoría de ‘Home’ foi ún recuperáu en Candás gracies a los trabayos fechos nos años 90 pol Grupu de Baille Tradicional San Félix que llevó Fernández Fernández. Mentes, en ‘Muyer’ el xuráu decidióse pol de Martínez García copiáu d’una fotografía de Baltasar Cué del 1880, con saya y chaquetina fecha en tafetán moráu escuru.

Dambos llevaron una recompensa de 200 euros y una lliga de llana esclusiva. Mentes, el segundu puestu en cada categoría foi pa Jesús Manuel Villanueva Rodríguez y Ana Isabel Pérez Santano, que vistieron un traxe del centru y ún de marinera; y el terceru pa Pedro Pangua y Rocío Fernández Collar, con ún de transición recoyío n’Insierto y un del suroccidente. Éstos recibieron 150 y 100 euros, de manera respeutiva.

Nesta ocasión el xuráu tuvo formáu polos espertos Amadéu Benavente, Constantino Menéndez, Consuelu Ríu y Ana Villanueva, que tuvieron la oportunidá de contemplar los traxes en dos ocasiones: la primera, al principio de la mañana, y la segunda, después de que caún de los 48 participantes desfilara énte les más de trescientas persones presentes na plaza de los Dolores. Tres conocese los premios, la folixa treslladóse a la plaza de la Panerina, onde Xosé Antón Fernández ‘Ambás’ armó una danza na que participaron non sólo los concursantes, sinón toles persones que quixeron entrar, vistíes o non col traxe tradicional.

Pela tarde, la danza y el baille continuaron na plaza’l Mercáu, animáu pola música en direuto d’Herbamora; la voz de la panderetera Leticia González, de Baselgas (Grau); la gaita y el tambor de Santi Galguera y Manolín El de Parres; y Cantaruxare, grupu de panderetes formáu por Ambás, Ramsés Ilesies y Paulino Santirso.

Conservar una forma de vistir

Esta folixa, entamada pola empresa de xestión cultural, comunicación y diseñu gráficu B.Alto en collaboración col Conceyu de Grau y Caja Rural de Asturias, “ta sirviendo pa que cada vez más persones tomen conciencia de la importancia cultural que tien conservar una forma de vistir que, coles sos peculariedaes xeográfiques y sociales, carauterizó a los asturianos y les asturianes dende, al menos, el sieglu XIX”.

Na imaxe, Pangua, Fernández Collar, Fernández Fernández, Martínez García, Villanueva y Pérez Santano. Semeya obra d'Ojos de Hojalata.