Llera Ramo y García Arias participen nuna xornada sobre l'asturianu

L'Aula Magna de la Universidá d'Uviéu acueye esta actividá de l'ALLA encuadrada nel programa 'Cuadonga Centenarios'.

Francisco José Llera Ramo va encargase d'abrir esti ciclu de conferencies que va celebrase mañana baxo'l nome de 'Llingua asturiana: una hestoria y un futuru'. El caderalgu de Ciencia Política de la Euskal Herriko Unibertsitatea (UPV/EHU), direutor del Euskobarómetru y autor de la reciente III Encuesta Sociollingüística d’Asturies va poner la intervención 'La llingua y la sociedá asturiana énte l'espaciu públicu' a les 17 hores.

Darréu, al rodiu les 18 hores, l'ex presidente de l'Academia de la Llingua Asturiana (ALLA), Xosé Lluis García Arias, va falar sobre 'El Reinu de los ástures: de les pallabres y los fechos'. Va zarrar l'actu l'Ochote Asturias con una actuación musical.