Fernando Lastra diz que "pue que nun ficiere méritos bastantes" pa merecer el 'antipremiu' contra la llingua de la Xunta

"El voceru del Grupo Parlamentariu Socialista na Xunta Xeneral del Principáu comunicó esta selmana, nuna carta unviada a la Xunta pola Defensa de la Llingua Asturiana, que ""pue que nun ficiere méritos bastantes pa merecer"" l'antipremiu 'Madreñazu' 2008, galardón negativu qu'esta organización concede a la persona o entidá que ficiere, al so xuiciu, méritos escontra la normalización del asturianu.

El diputáu socialista mandó una carta a la organización agradeciendo la ""reconocencia"" y diciendo que la recibía ""con toa deportividá"". ""Espero nun pecar de falsa modestia al considerar que pue que nun ficiere méritos bastantes pa marecer el so amable reconocimientu; voi amplicame, nel futuru, col meyor espíritu de superación"", añadió.

La Xunta fizo pública la carta tres anunciar la convocatoria del actu d'entrega de los premios Andrés Solar, que nun van contar evidemente cola presencia de Lastra, y sí colos galardonaos na versión positiva, 'Pegoyu, l'asociación Softastur, una plataforma de programadores y traductores en llingua asturiana dedicada a la traducción y desarrollu de software llibre n'asturianu.

Ente los proyeutos de Softastur tán el Sistema Operativu Ubuntu, el caltenimientu del navegador Firefox en llingua asturiana, y el proyectu MediaWiki. La xunta consideró ""mui de valorar el trabayu constante y desinteresáu de les persones que formen parte de Softastur, abriendo camín pal usu de la llingua asturiana nel ámbitu de les tecnoloxíes nueves, amosando una vez más que l'asturianu tien y pue tar en tolos ámbitos de la vida moderna"".

La ceremonia va tener llugar el sábadu 20 d'avientu, a les 19:30 hores, nel Salón d'Actos del Antiguu Institutu de Xixón. Nel actu va tar David Melendi Palacio, Decanu del Colexu Oficial d'Informáticos del Principáu d'Asturies, que va intervenir pa falar de la importancia y les posibilidaes de la presencia de la llingua asturiana nel ámbitu de les tecnoloxíes nueves. El colectivu Softastur, va facer una intervención visual onde van esplicarán cómo trabayen y van enseñar dalgunos de los frutos d'esi llabor. Arriendes d'esto, la Xunta pola Defensa de la Llingua Asturiana (XDLLA) va lleer el so tradicional discursu añal, onde fai repasu a tolo referente a la llingua asturiana y el so futuru nel últimu añu.

La parte musical va venir de la mano de DRD. La Xunta recordó que ye una de les bandes de más sonadía na escena musical asturiana. Tán acabantes de sacar el so segundu trabayu discográficu, del que van tocar delles pieces nel actu."