La cultura castreña, nel Atenéu Obreru de Xixón

"El próximu miércoles, día 17 d'avientu a les 19:30 hores, tendrá llugar nel Atenéu Obreu de Xixón, asitiáu na xixonesa cai Cuadonga, númberu 2, pisu 1u, la charra ""Cultura Castreña nel Noroeste Peninsular"", a cargu del arqueólogu Alfonso Menéndez Granda, Llicenciáu en Xeografía y Hestoria pola Universidá d'Uviéu y director téunicu de delles excavaciones, toes elles feches nestos caberos años: los castros de Chao Samartín, Monte Castrelo de Pelou y, anguaño, Os Castros de San Tirso d'Abres.

Alfonso Ménendez, tien espublizaos, xunto a la tamién arqueóloga Estefanía Sánchez Hidalgo, dellos trabayos, ente ellos tan los inventarios arqueolóxicos de tres conceyos asturianos: Cabrales, Ponga y Casu; amás d'artículos en revistes especializaes al rodiu la Terra Sigillata nel castru de Chao Samartín, situáu en Grandas. Dende'l conocimientu de primera mano de los caberos descubrimientos fairase una revisión de los elementos que conformaron esta rica cultura a lo llargo'l tiempu: llendes territoriales, tipos de castros y ocupación del territoriu, sistemes defensivos, urbanismu de los poblaos, cultura material y cómo, en definitiva, la Cultura Castreña pervivió a lo llargo un mileniu nel territoriu asturianu, dende la Edá del Fierru a la Edá Moderna.

La cultura castreña desendolcose, dende finales de la Edá del Bronce hasta entamos la nuesa era, nel noroeste de la Península Ibérica, dientro de una fastera qu'abarcaría'l norte del actual Portugal dende la oriella norte del riu Dueru, Galicia, la fastera occidental del Principáu d'Asturies y un cachu del noroeste de Llión."