Carcedo noma a Faustino Blanco secretariu xeneral de Sanidá

El conseyeru de Sanidá con Javier Fernández na llexislatura pasada, Faustino Blanco, ye’l secretariu xeneral nuevu de Sanidá en sustitución de Ricardo Campos. El Conseyu de Ministros aprobó’l nomamientu del médicu a propuesta de María Luisa Carcedo.

Llicenciáu en Medicina y Ciruxía nel año 1978 pola Universidá d’Uviéu y médicu especialista MIR en Medicina Familiar y Comunitaria, anguaño trabaya nel xixonés Centru de Salú d’El Coto. Na so trayeutoria profesional destaca la ocupación de la direición xeneral del Serviciu de Salú del Principáu d’Asturies (SESPA) nel 1994, del que tamién foi miembru del conseyu d’alministración ente 1995 y 2003, amás del so cargu de conseyeru del 2012 al 2015.

“Nun tengo dulda de qu’esti nomamientu, al igual que’l de la ministra, repuntará nel beneficiu d’Asturies y d’esti serviciu públicu esencial”, declaró tres conocer la noticia Francisco del Busto, actual conseyeru de Sanidá. Sobre Blanco destacó que “ye un gran conocedor del sistema sanitariu y de la sanidá asturiana”.

Na imaxe, Blanco y Del Busto nel momentu del trespasu de carteres. Semeya obra d'Armando Álvarez.