El decanu de filoloxía propón que l’asturianu sía una “minor” nos nuevos planes d’estudios

El nuevu decanu en funciones de la Facultá de Filoloxía, José Antonio Martínez, dio anuncia de la propuesta del decanatu pa la inclusión del asturianu nos nuevos planes d'estudios. Esta propuesta asitia l'estudiu del idioma dientro de la categoría de grau menor ("minor"), esto ye, como complementu de les de grau mayor ("maior"). Esta propuesta va ser sometida a votación a finales d'esti mes nuna Xunta de Facultá y d'aprobase supondría una carga lectiva de 48 créditos y 8 asignatures.

Esta propuesta vien depués de la dimisión de l'anterior decana y presidenta de l'Academia de la Llingua Asturiana, Ana Cano, tres que la Xunta de Facultá refugase incluir l'asturianu ente les grau "aaior", lo que suponía netrar nos estudias al mesmu nivel que l'alemán, el francés, o l'italianu. Agora'l nuevu equipu decanal en funciones porpón que l'asturianu s'estudie como complementu de les "maior", según la nueva terminoloxía que supón l'adaptación de los planes d'estudios universitarios al Espaciu Européu d'Educación Superior.

D'esti mou l'estudiu de la llingua y lliteratura asturiana constaría de 8 asignatures de 6 créditos cauna, pudiendo estudiase al empar y como complementu d'una maior, que consta de 120 créditos. L'asturianu taría asitiáu xunto a otros diez "minor" como "traducción" "llingües clásiques", "filoloxía románica" o "comunicación", amás del inglés, francés, alemán, italianu y portugués. Sicasí, esto nun supón que l'asturianu tea al empar que'l resto de les llingües mencionaes, yá qu'ente los cinco maior propuestos, "Lengua Española y sus Literaturas", "Estudios Ingleses", "Lengua y Literatura Románicas Comparadas", "Clásicas" y "Lenguas Modernas", yá tan incluyíos esos idiomes pero non l'asturianu.