Los talleres de llectura de Villaviciosa y Nava comiencen esti mes

Yá ta abiertu'l plazu a participantes nuevos pa inscribise a esta actividá gratuita.

Laura Marcos, el día 27 en Nava, va abrir esta temporada nueva de los Talleres de Llectura n'Asturianu qu'entama'l Serviciu de Normalización Llingüística de la 'Comarca de la Sidra' nesta villa y en Villaviciosa. L'autora del Caudal va aldericar colos participantes sobre la so obra 'Cuentos de ser y tar', a la que van tener accesu previamente.

Y ye que toles persones apuntaes a los talleres reciben un exemplar de cada llibru n'empréstamu pa, depues de la so llectura, celebrar un alcuentru col escritor nel que pueden compartir impresiones y conocer más a fondu'l procesu creativu y les circunstancies al rodiu de cada obra. Los interesaos en participar nesta iniciativa pueden informase y apuntase, hasta final de mes, nel corréu normastur@lacomarcadelasidra.com o nel teléfonu 985.71.84.13 n'horariu de mañanes.

Otra manera, tamién yá se conoz el primer convidáu en Villaviciosa. Va ser Xuan Santori'l día 25 d'ochobre col llibru '42.553. Depués de Buchenwald', ganador últimu del Premiu Máximo Fuertes Acevedo d'ensayu.