38 escolinos d’Infantil del colexu de Morea nun reciben clase de Llingua Asturiana, denuncia SUATEA

"Educación niega l’asturianu al alumnáu d’Educación Infantil", afirma SUATEA, que ta acabante de dar a conocer el casu del CEIP Moreda y tien constancia de más situaciones n’otros centros de Xixón y Uviéu. 38 escolines y escolinos nun va recibir clase de Llingua Asturiana a pesar de que los sos padres escoyeren esti conteníu pa los sos fíos.

Esta situación dase porque la Conseyería d’Educación y Cultural namái destinó a esti centru a una maestra, y a media xornada, "magar que la direición del centru y los padres y madres yá  lleven reclamando dende últimos del cursu pasáu la necesidá d’una profesora a tiempu completu p’atender les necesidaes de l’área na escuela". N’Infantil, les families qu’optaron de manera voluntaria pol asturianu suponen un 88,8 por cientu del total de los trés grupos d’esti ciclu.

El Sindicatu Unitariu Autónomu de Trabayadores de la Enseñanza d’Asturies (SUATEA) afirma que’l casu de Morea "resulta enforma sangrante" porque "l’alumnáu d’EI de 4 y 5 años d’anguaño llevaba recibieno clase d’asturianu dende qu’anició la so escolarización hai dos años y ve cómo agora s’interrumpe arbitrariamente".

Nun ye un casu únicu

Según tien constancia’l sindicatu educativu, escueles de Xixón y Uviéu tán negando tamién estes enseñances a rapacinos y rapacines de 3 años qu’entamen la so escolarización "y ello magar a la voluntá de recibiles espresada polos sos padres y madres nel procesu matriculación". Esto dase a pesar de que, per primer vegada en venti años de vigor de la Llei d’Usu y Promoción del Bable/Asturianu, nes instrucciones d’aniciu de la conseyería pa esti cursu espresábase nes primeres páxines "promocionar la lengua asturiana y su uso en el sistema educativo, garantizando su enseñanza en todos los niveles y grados".

Anguaño, "acabanda prácticamente yá la llexislatura", poco más de cuarenta centros ufierten conteníos d’asturianu n’Infantil, "lo que sumao a estos casos, amuesa la falta de rigor y compromisu de la Conseyería d’Educación cola enseñanza del asturianu  y rescampla la necesidá de siguir esixendo la presencia del asturianu y el gallego-asturiano na Educación Infantil", apunta SUATEA.