Iniciativa pide al alcalde "pasos hacia la normalización en Siero"

"Agradecemos les disculpes, pero ye'l momentu de pasar de les pallabres a los fechos", señala Inaciu Galán.

El presidente d’Iniciativa pol Asturianu añadió que "la situación del asturianu en Siero ye grave. El conceyu sigue ensin ordenanza d'usu del asturianu, magar que s'aprobó en Plenu y a qu'hai un testu que tien el vistu bonu de los servicios xurídicos del Gobiernu d'Asturies. Lleva tres años esperando que se lleve a Plenu y creemos que ye un bon momentu p'aprobala y ponela en marcha”. Tamién recordó que “nun esiste nenguna política llingüística nin Plan de Normalización, nin se ta cumpliendo col usu la toponimia oficial, nin nel nuevu llogotipu del Conceyu nin na páxina web onde la versión n’asturianu ye de mentira porque nun tien siquiera conteníos actualizaos. Amás, el Serviciu de Normalización Llingüística sigue a media xornada y ensin recursos”.

Galán considera que "la meyor manera de sofitar l'asturianu ye dando una solución a toes estes cuestiones y ponese a trabayar d'una manera seria. Por eso pidimos al alcalde de Siero pasar de les pallabres a los fechos". Ángel Antonio García González protagonizó esta selmana una polémica al difundise una recomendación a unes escolines y escolinos de Primaria del CRA de Villa de que deprendieren inglés "meyor" que pallabreru asturianu, dalgo que'l socialista negó pa, darréu, pidir disculpes poles "interpretaciones que se fixeron de les mios pallabres".

Semeya de Denis Soria baxo llicencia CC BY-SA 3.0.