Carcedo conviértese na primer ministra asturiana de la historia del Estáu

Pedro Sánchez nomó a última hora del martes a María Luisa Carcedo ministra de Sanidá, Consumu y Biniestar Social en sustitución de la dimitida Camen Montón. La de Santa Bárbola conviértese asina na primer muyer nacida n’Asturies al frente d’un ministeriu.

Nun había ministros asturianos nun executivu dende l’últimu del popular José María Aznar, nel poder hasta’l 2004, con Rodrigo Rato na vicepresidencia y a cargu de la cartera d’Economía y, Francisco Álvarez-Cascos de la de Fomentu. Con un socialista al frente, habría que retroceder hasta Gustavo Suárez Pertierra, ministru de Defensa hasta 1996 con Felipe González de presidente, y anteriormente d’Educación y Ciencia.

Con esti nomamientu, Carcedo pasa a la historia como la primer ministra asturiana n’ocupar el cargu de ministru. Matilde Fernández, responsable d’Asuntos Sociales con González nel periodu 1988-1993, tenía venceyos con Asturies pero yera natural de Madrid.

Otru máster de la Universidad Rey Juan Carlos I

Carcedo, muyer de confianza de Pedro Sánchez y ún de los mayores apoyos del agora presidente, ocupaba dende’l cambiu de Gobiernu el cargu d’Alta Comisionada del Gobiernu estatal de Llucha contra la Probeza Infantil. La dimisión de Montón na tarde d’ayeri poles irregularidaes atopaes nel so máster en ‘Estudios Interdisciplinares de Género’ de la madrilana Universidad Rey Juan Carlos I pol dixital Eldiario.es, ampliaes pola canal de televisión laSexta, llevó a Sánchez a nomar a l’asturiana a última hora como sustituta de la valenciana.

Nacida nel conceyu de Samartín del Rei Aurelio nel 1953, la ministra nueva ye llicenciada en Medicina y Ciruxía pola Universidá d’Uviéu y diplomada en Medicina d’Empresa pola Escuela Nacional de Medicina del Trabajo. Na so trayeutoria política foi diputada na Xunta Xeneral ente 1994 y 2004 y conseyera de Mediu Ambiente y Urbanismu na so primer llexislatura con Juan Luis Rodríguez-Vigil y Antonio Trevín, parllamentaria nel Congresu del 2004 al 2015, y senadora en representación de la Cámara asturiana del 2016 ente’l 2016 y el 2017, siendo anguaño parte de la Comisión Executiva Federal del PSOE como secretaria executiva de Sanidá y Consumu.

Recién foi criticada por votar nel Senáu en contra d’una enmienda de Compromís pa que l’Academia de la Llingua Asturiana (ALLA) recibiera una partida de los PXE, como’l restu d’academies de les llingües del Estáu, al igual que’l restu de senadores asturianos, anque posteriormente asegurara qu’apuesta por “cuidar” l'idioma pa “salvalu del so desaniciu” y que “tol mundu presume de llingua y nós tenemos la de nueso”, defendiendo asina la oficialidá ‘amable’ pola que puxa anguaño la FSA.