L'alcalde de Siero recomienda a escolinos deprender inglés "meyor" que pallabreru asturianu

Nuna visita al CRA de Viella pol comienzu del cursu. Iniciativa esixe al socialista que respete "la voluntá d'eleición de los padres" y anima a denunciar casos de discriminación.

Ángel Antonio García González acudió ayeri acompañáu de la conceyala d'Educación, Cultura y Recursos Humanos, Aurora Cienfuegos, a esta escuela xunto con ediles d'otres formaciones. La razón yera una visita institucional con motivu del aniciu de les clases y conocer les meyores feches nel centru.

Mientes la xornada, tamién aprovecharon pa visitar les aules y na conxunta de terceru y cuartu de Primaria diose un fechu que nun pasó desapercibíu por tolos presentes. Cienfuegos afaló a les escolines y escolinos a deprender pallabreru asturianu, a lo que l'alcalde retrucó que "meyor n'inglés".

"Llamentables declaraciones"

Iniciativa pol Asturianu nun tardó en reaicionar tres conocer esti fechu y esta mesma mañana asoleyó un comunicáu nel que pide al alcalde de Siero "que respete la voluntá d’eleición de los padres a la hora d’elixir asturianu na ufierta educativa y que nun menosprecie el deprender asturianu", asina como a la FSA-PSOE "que desautorice estes llamentables declaraciones”. Fonsu Martín, responsable de la estaya d’Enseñu de la organización, tamién aprovechó pa felicitar a la conceyala "por promover una idea positiva del idioma propiu de Siero ente los escolinos".

D'igual forma, aprovechando l'aniciu del cursu, recuerda a les families qu'Iniciativa pol Asturianu "ta’l serviciu de los pas y les mas que tuvieren dalgún tipu de problema a la hora de matricular a los estudiantes n’asturianu pa denunciar esta situación”. “Cada cursu alcontrámonos problemes y dificultaes pa que los escolinos puedan matriculase n’asturianu como pa qu’agora un alcalde mos venga a falar de lo que ye meyor o peor", incide Martín, qu'añade que "tan importante ye deprender asturianu como inglés. La educación nun se puede convertir nuna competición absurda pola supuesta utilidá de los conteníos nin les asignatures".

Semeya propiedá del Conceyu de Siero.