'Cuadonga como símbolu identitariu asturianu', conferencia esti xueves en Xixón

Va tener llugar esti xueves 6 de setiembre a les 19 hores na Sala Conferencies del Antiguu Instititutu Xovellanos de Xixón cola participación de Mariano Suárez y Roberto González-Quevedo.

Andecha Astur organiza esta conferencia col envís de "afitar tamién la trescendencia que tien Cuadonga como referente pal Pueblu Asturianu" y desmontar los bilordios  "de la monarquía española de reivindicase nesti Día de la Nación Asturiana presentándose en Cuadonga como continuadora del Reinu d'Asturies, ya incluso de la propia monarquía asturiana y apropiándose d'ún de los principales referentes simbólicos, míticos y hestóricos de la nación asturiana". 

Na conferencia intervendrá Llucía Fernández en representación d'Andecha Astur y los ponentes son:

• Roberto González-Quevedo filósofu, doctor n'antropoloxía y llingüísta, miembru de númberu de l'Academia de la Llingua Asturiana ocupando'l cargu de secretariu, y direutor de la revista Cultures, y cuya intervención entitúlase 'Cuadonga y la so mitificación'.
• Mariano Suárez, mayestru, autor d'obres imprescindibles de la historiografía asturiana como '¿Quién escaeció a Belarmino Tomás?"', y cuya intervención nesta conferencia lleva per entítulu '¿Por qué Asturies tien 10 Cuadongues?'.

La entrada ye abierta al públicu y a la fin de les intervenciones habriráse un alderique ente los asistentes.