Informen de que'l xuez ordena la retirada de la candidatura d'Andecha Astur de les elecciones europees
|
4 Xunu, 2009 por E.P. / Redacción
- Inicie sesión o rexístrese pa espublizar comentarios
Un grupu de persones, nes sos pallabres, "militantes d'Andecha Astur", que caltienen dende hai dos años un pleitu contencioso-alministrativu cola direición d'esta organización política, informó que'l xulgáu nº3 d'Uviéu ordenó, como midida preventiva, la retirada de la candidatura d'esta formación a les elecciones europees. Asturies.com púnxose en contactu con Andecha Astur pa recoyer la so reacción. El so candidatu negó "qu'Andecha nun puea presentase".
Trataríase d'una confirmación del autu que'l mesmu xulgáu emitió enantes del entamu de la campaña electoral.
Al traviés d'un comunicáu, "en nome de los 65 militantes", remitíu a esta axencia, esplícase que la decisión xudicial ordena "la retirada de la candidatura d'Andecha Astur a les elecciones europees", que, según cita lliteral, "presentaron persones que nun formen parte de la direición del partíu, y poro, nun puen participar na so representación nel procesu electoral".
Los denunciantes esplicaron tamién que "según la normativa de la Xunta Electoral Central, les candidatures puen retirase en cualquier momentu anterior a la votación, o hasta'l mesmu día de les eleciones", y que, si nun la retiren, "van cometer un delitu de desobediencia". Nel autu xudicial, requierse, amás, que "cesen nel usu de la páxina web andecha.org, y suspendan toles sos actuaciones realizaes en nome del partíu dende abril del 2008", según informa la nota.
Esta decisión xudicial ye de momentu la última d'un procesu entamáu hai dos años. El comunicáu informa de que de los 65 "militantes", en nome de los que se presentó la nota, "dalgunos participaron como simpatizantes n'otres formaciones polítiques, dientro del procesu d'agrupamientu y ampliación de la izquierda nacionalista asturiana, atendiendo a los deseos de la mayoría de militantes d'Andecha Astur, y por mor de la so esclusión forzosa de la so organización". El propiu xuez esclara que, en tou casu, nun se trata d' una situación de doble militancia, porque p'acreditar esti estremu ye precisu un procedimientu contradictoriu d'audiencia y defensa de los interesaos, que nun se dio en nengún momentu", acaba'l testu.
Andecha Astur niega que nun pueda presentase
Puestos en contactu con Andecha Astur, el so cabeza de llista, Mariu Arbesú, comentó lo siguiente: "UNA ye una organización política que compite electoralmente con Andecha Astur pues movémonos nun espaciu políticu asemeyáu y, nesti sen, llamentamos qu'una dirixente d'Unidá Nacionalista Asturiana haya puesto una demanda contra Andecha Astur intentando que nun puea presentase a les elleiciones, pero nun ye cierto qu'Andecha nun puea presentase y dafechu muncha xente yá votó por corréu a Andecha Astur, y el domingu serán munchos más los qu'escueyan la nuesa papeleta nos colexos elleutorales y tamién nos voten".
UNA niega cualesquier vinculación con esti fechu
Pela so parte Unidá Nacionalista Asturiana fixo llegar un comunicáu nel qu'afita que "con motivu de la noticia apaecida esti xueves en dellos medios, onde s'informa que'l xulgáu númberu trés de primer instancia d'Uviéu ordenó, como midida preventiva, la retirada de la candidatura d'Andecha Astur pa les elecciones del día 7, la Xunta Executiva Nacional d'UNA quier esclariar delles cuestiones: El conflictu llegal pola titularidá de la sigla Andecha Astur ye un procesu que dura más de dos años. Esi conflictu llegal yelo d'Andecha Astur y la so militancia, polo qu'Unidá Nacionalista Asturiana nun tien absolutamente nada que ver con ello y abstenémonos de facer cualisquier tipu de valoración sobre esi tema".
Finalmente señala que "nin Unidá Nacionalista Asturiana nin nengún miembru de la so Executiva actual fexo denuncia nenguna escontra otres candidatures, polo que toles informaciones nesi sen nun son otro que bilordios fechos cola mala intención d'implicar a UNA nel conflictu internu d'otra organización".
Efrén d'Andrés
Comentarios
¿Pero esto que coyones ye?
A veces pienso, si nun habra xente infiltrao , nesto del nacionalismu asturianu, al serviciu de la FSA de las JONS o de la so "muletilla" los de IU-BA que nin a cayau algama .
Mecagondios ya lo tengo claro nun tenia pensao dir a votar , pero el domingu el mio votu va pa Andecha Astur como ta mandao.
Tras la so última proeza,Ya sé a quien NUN votar: a la UNA. "Como el perro del hortelano, ni comen ni dejan comer".
Xudicialmente será mui correcto, pero:
--Políticamente, desastroso.
--Estratéxicamente, demencial.
Empobínase xusto pel camín contrariu al que les circunstancies históriques y la demanda social nacionalista aconseyen.
Lo políticamente desastroso y estratéxicamente demencial ye que sigas faciendo'l xuegu a un grupu de xente ensin llexitimidá nenguna.
Si ye que nun-yos prestaba lo que decidieren la mayoría de militantes d'Andecha Astur, que montasen otru partíu, asina de cenciello.
Según tu, ¿qué teníen que facer los militantes d'Andecha Astur a los que nun se-yos ta permitiendo l'usu de la siegla? ¿callar la boca como afogaos? ¿o ri-yos les gracies a los otros?
Si'l vecín d'enfrente te cambia la llave de la puerta del portal, ¿qué dibes facer?
La guerra esta de los dos sectores d'Andecha ya repuna. Lleven 2 años col rollu y cuando paez que ya ta vuelve salir. A ver si s'aclara de quién ye la sigla d'una vegada y se dexa d'enredar con estes coses.
Verás, agora resulta que la culpa ye de la UNA. La noticia diz claramente que la demanda pusieronla un grupu de persones militantes d'Andecha Astur, que l'asuntu poles sigles y les guerres internes lleva mas de dos años p'alantre y p'atrás, enantes de que se constituyera la UNA , y resulta que según algunes "lumbreres" y el candidatu d'Andecha la culpa ye de la UNA.
Según la noticia la UNA nun interpuso nenguna demanda (amás como va interponer algo enantes de refundase no que ye agora¡¡¡¡¡) y ye que ye lóxico ¿creeis qu'un xuez va proponer la non participación d'un partíu porque otru-y lo pida? Si n'Andecha nun saben arreglar los sos problemes internos namás que nos xulgaos ye cosa d'ellos, pero señalar a la sigla "competidora" como responsable ye de llocos o de malintencionaos.
Tal nivel de mentiras ya toxicidá informativa, da muesa de lo rastrero que ye dalguna xente con tal de emporcar.
UNA nun tien nada que ver con ninguna denuncia escontra Andecha Astur que disfruta colas sieglas por ultima vegada nunas elleiciones. Dempues que vaya MAF co l'abogau d'Areces, a defendelu.
Las sieglas d'Andecha Astur nun puen usase POR VARIAS SENTENCIAS XUDICIALES, colo cual NUN PUEN PRESENTASE POR ORDEN XUDICIAL, anque pasaranselo pol forru como fain habitualmente.
UNA ye actualmente el nacionalismu asturianu.
MAF, Arbesu ya cuatro colgaos mas son el lastre, la caspa, ya la vergoña del nacionalismu asturianu nos ultimos 20 años, son el ridiculo al serviciu de MAF, que sigan siendu esu peru que nun empuerquen a UNA.
Polo llegal o lo criminal, propuesta política real y posibilista alexao de escisiones. Nun se pue siguir faciendo el ridículo.
Si tan malonos son AA, entós cómo ye que tuvieron más votos Andecha que UNA nes caberes eleiciones?? A mí que me lo espliquen.