La demanda d’una República Asturiana centró l’homenaxe al Conseyu Soberanu en Tarna

Andecha Astur entamó’l sábadu en Tarna’l yá tradicional homenaxe al Conseyu Soberanu d’Asturies y Lleón 81 años depués de la so creación. La demanda, como apuesta de futuru, d’una República Asturiana "que seya garantía de democracia, de respetu a los drechos individuales y colleutivos”, centró l’actu.

La xornada comenzó con un ascensu hasta les trincheres de L’Abidular, llugar dende onde se frenó la entrada del exércitu franquista, y la visita a la casamata defensiva de Tarna. Darréu fíxose un homenaxe floral delantre’l monumentu que recuerda’l Conseyu Soberanu y hebo un actu políticu nel qu’intervino Marcos Fernández.

Énte banderes d’Asturies y Lleón, recordó los fechos históricos que llevaron a la convocatoria del homenaxe y declaró que “nós somos los nietos y bisnietos d'aquellos homes y muyeres, y como ellos tamién tenemos un proyeutu de recostruición nacional y social, y como ellos, sabremos tar al altor de les circustancies y avanzar nesa República Asturiana que seya garantía de democracia, de respetu a los drechos individuales y colleutivos, y l'apueste de futuru d'esti país d'homes y muyeres llibres, d'un pueblu soberanu del que formamos parte y qu'alita ente nós". D’igual forma denunció’l silenciamientu de la historia del país y llamó a la participación na movilización prevista en Cangues d’Onís el Día de la Nación Asturiana pola presencia en Cuadonga de los monarques españoles perafitando que “Asturies nun tien rei”.