Los xulgaos de Xixón y Avilés van acoyer obres

Pa la instalación del nuevu xulgáu de primer instancia númberu 12, y la meyora del aparcamientu y un aumentu de la lluminosidá, de manera respeutiva.

El Gobiernu sacó a llicitación por un importe de 198.736 euros les obres d'adptación de les instalaciones que van acoyer el nuevu xulgáu de primer instancia númberu 12 de Xixón. La sede xudicial va allugase na planta segunda del Palaciu de Xusticia de la ciudá, concretamente nel bloque del estremu este del edificiu.

Con un plazu d'execución de dos meses, el proyeutu prevé l’habilitación de distintes sales y espacios pal desenvolvimientu de l'actividá diaria del xulgáu, que va tener una superficie útil de 257 metros cuadraos, creándose un despachu pal xuez y otru pa lletraos, un archivu, una área d'atención al públicu y una sala polivalente. La sede va disponer tamién d'una zona pa la oficina xudicial allugada na parte central.

Les meyores d'Avilés

Al empar sacóse a concursu les obres de meyora del Palaciu de Xusticia d'Avilés, con un presupuestu de llicitación de 60.614 euros. Los trabayos van centrase nel aparcamientu y en dos de los patios interiores del inmueble.

Na zona del estacionamientu va ameyorase'l pavimentu, va llendase y numberase les places, y va instalase una rampla d'accesu col propósitu de facilitar la circulación. Tocantes a los patios, va ameyorase l'estáu de les paredes p'aumentar la lluminosidá.