Raquel F. Menéndez recibe'l sábadu'l Malory

La tertulia escoyó 'El llibru póstumu de Sherezade' como meyor obra del 2017.

El pub Tom Malory de L’Entregu, onde dende hai venti años vienen aconceyando un piñu d'escritores y aficionaos a la lliteratura, va acoyer el sábadu a les 17.30 hores un actu públicu nel que Raquel F. Menéndez va recoyer el premiu que vien entregando dende'l 2012 y que premia a la meyor obra en llingua asturiana espublizada l'añu anterior. El xuráu, conformáu por Xulio Arbesú, José Luis Rendueles, Pablo Rodríguez Medina, Solinca Turbón, David Fernán, Roberto Corte, Chechu García y Henrique G. Facuriella, falló nesta ocasión pol 'Llibru póstumu de Sherezade' de l'autora de Vallouta.

L'acta destaca "l'autenticidá de la voz poética y la verdá de les emociones que l’autora espeya en caún de los poemes, unes emociones que tienen como puntu de partida les rellaciones ente les trés protagonistes femenines del llibru: la propia poeta, la güela con Alzheimer y la madre. L’autora muéstrase heriede de un llinaxe femenín que se materializa nel conocimientu que vien al traviés de los oxetos probes –botones, alpargates, el café de pota…– pero, sobre too, de los cuentos, como aquellos colos que la Sherezade de 'Les mil y una nueches' va consiguiendo ganar un día más de vida".

La recompensa que va recibir Menéndez va ser una ilustración d'Alfonso Zapico y una medaya conmemorativa. D'esta forma l'autora moza incorpórase al palmarés d'esti gallardón xunto con otros destacaos nomes de la lliteratura asturiana: Xabiero Cayarga, con ‘La neve del cuquiellu’ (2011); Ruma Barbero, con ‘La Chelita’ (2012); Milio Rodríguez Cueto, con ‘Carne de melandru’ (2013); Consuelo Vega, con 'Más espeso que l'agua' (2014); y Ángeles Carbajal, con 'L'aire ente la rama' (2015); y Francisco 'Paco' Álvarez, con 'Lluvia d'agostu' (2016).

El premiu de la Tertulia Malory nació pa prestixar les lletres asturianes, al empar que da difusión a les obres que, a criteriu del xuráu, sían consideraes los meyores llibros escritos cada añu n'asturianu.

Na semeya, l'autora mientres la presentación del 'Llibru póstumu de Sherezade' na edición del añu pasáu de la Feria del Libro de Xixón.