IX-BA-Verdes critica los presupuestos de Cultura pal 2009 y denuncia el "tratu denigrante" hacia la llingua asturiana

"El diputáu d'IU-BA-Verdes, Francisco Javier García Valledor, dixo güei que nun comparte nin la cuantía asignada nin la orientación del gastu en materia cultural pal 2009, aludiendo al proyeutu presupuestariu del Executivu, y denunció'l ""tratu denigrante"" qu'al so xuiciu se-y da a la llingua asturiana, al destinase subvenciones a la RTPA pa facer programes n'asturianu.

Nel so turnu p'afitar posición, tres la declaración de la conseyera de Cultura y Turismu, Mercedes Álvarez, el diputáu dixo que se-y da al gastu en Cultura un usu que ""s'alloña sustancialmente"" del acuerdu de Gobiernu na materia. Recordó que na negociación del acuerdu incorporáronse nesti programa 500.000 euros sobre'l creitu definitivu del 2008. Esto supón que se produz un aumentu de 348.292 euros sobre'l proyeutu de presupuestos refugáu del 2008, un 11,23%.

Sin embargu, esplicó qu'al analizar a ónde va dirixíu esi incrementu, el mayor aumentu se produz nel capítulu VI, inversiones en propiedá intelectual, que pasa de 40.090 a 338.026 euros, ye dicir un crecimientu del 845% (338.026 euros), que se dirixe a la Radio Televisión del Principáu (RTPA) pa programes n'asturianu. Esti fechu, pa IU-BA-Verdes demuestra'l ""tratamientu denigrante"" que se-y da a la llingua asturiana.

""¿Por qué ye necesario sovencionar nel ente públicu un programa realizáu en llingua asturiana y non en castellán?, ¿ye más caro realizar un programa en llingua asturian que si se fai en llingua castellana?"", entrugóse Valledor. Al so xuiciu, el problema de fondu ye la falta de voluntá política pa desarrollar una programación n'asturianu na RTPA y lo que se pretende en realidá ye siguir dotando de fondos públicos al ente.

El diputáu d'IU-BA-Verdes dixo que s'incrementen un 8,5% les tresferencies corrientes, con aumentos pequeños en toes menos dos casos mui significativos nos que se baxa la sovención. Nel casu de los conceyos redúcense 30.800 euros, un 7,7% y nel de l'Academia de la Llingua recórtase a 3.393 euros, un 2,3% menos. Valledor calificó estes cifres de ""inaceptables"" y de ""provocación"".

CRÍTIQUES A LA CIFRA TOTAL

Valledor comentó que pese a que nel marcu de la negociación del acuerdu de gobiernu s'incorporaron 500.000 euros pa la Política Llingüística y s'amplió la cantidá asignada al conxuntu de la Conseyería, nun se ve asina na cifra total pa los programes culturales. Asina, frente a los 78.551.735 euros presupuestaos pal 2008, nel proyeutu refugáu, nel proyeutu del 2009 hai destinaos 75.990.492 euros, lo que constitúi una reducción del 3,26% nes polítiques culturales.

Les cuentes amás, aumenten nel so conxuntu un 1,46% en rellación al proyeutu refugáu pal 2008 que yera'l primer proyeutu presupuestariu en materia cultural na historia de la nuesa Comunidá que proponía un recorte cercanu al 3%.

Valledor denunció que, inda coles incorporaciones realizaes na negociación del acuerdu de gobiernu'l proyeutu del 2009 del conxuntu de la Conseyería de Cultura y Turismu por importe de 146.804.678 euros, ye inferior hasta al presupuestu prollongáu del 2008 con un créitu definitivu de 146.984.735 euros. Ello ye, 100.057 euros menos, un 0,12%. El diputáu d'IU-BA-Verdes calificó esta situación de ""inaceptable"".

""Siendo inaceptable esta situación, lo ye más, como veremos a continuación, la orientación que se-y da al gastu en Cultura que s'alloña sustancialmente del acuerdu de gobiernu nesta materia"", dixo.

Tamién tuvo crítiques pa les cuentes en Promoción Cultural y Biblioteques, onde dixo que se conxelen toles sovenciones que son les que promocionen l'actividá cultural en tolos ámbitos de la cultura asturiana y hasta se baxa l'aportación a la OSPA, Ridea, les sovenciones a les actividaes culturales d'asociaciones y l'Asociación d'Amigos de la Ópera. ""Paez que la orientación política del gastu nada tien que ver col acuerdu de gobiernu"", llamentó'l diputáu."