El Principáu rexistra unes cifres de fracasu y abandonu escolar de sobre'l 14 por cientu

"Asturies rexistra unes cifres de sobre'l 14 por cientu de fracasu escolar, según esplicó a los medios de comunicación el director xeneral de Polítiques Educatives y orientación Académica del Principaú, Luis Enrique García-Riestra. ""Les cifres d'abandonu tempranu, ye dicir, población mayor de 18 años que nun sigue estudios más allá de los obligatorios, son asemeyaes"", declaró con motivu de la presentación de los departamentos d'orientación d'educación secundaria d'Asturies de los nuevos materiales pa la prevención del abandonu escolar.

El director xeneral de Polítiques Educatives y Orientación Académica aconceyóse güei con tolos orientadores educativos d'Asturies de tolos centros calteníos con fondos públicos pa da-yos materiales teúnicos a los tutores y orientadores col fin de llanzar una campaña escontra l'abandonu tempranu, según declaró Luis Enrique García-Riestra. ""La campaña pretende que los alumnos nun renuncien a siguir estudiando una vez que cursen la ESO"", esplicó.

Ángel Fernández Rodríguez, xefa del Serviciu d'Alumnáu, Participación y Orientación Educativa, esplicó que la campaña va dirixida al alumnáu de 15 años que ta cursando cuarto de la ESO. ""Lo que güei presentamos son los materiales que van trabayase nos institutos y los colexos de Secundaria de toa Asturies, pensaos pa utilizase nes tutoríes"", declaró.

Asturies alcuéntrase aproximadamente na metá sobre la media nacional, ""nun debemos conformamos porque l'oxetivu ye que'l 90% de la población xuvenil se titule más allá de la secundaria obligatoria"", apuntó'l director xeneral de Polítiques Educatives y Orientación Académica, ""ye dicir que saquen el títulu de bachilleratu o de formación profesional de grau mediu"", añadió.

Tamién se refirió a la idea d'ofrecer la posibilidá de retomar los estudios a persones adultes. ""Queremos algamar y incorporar al sistema educativu a aquellos adultos que nel so día abandonaron los estudios pa qu'algamen una cualificación y una titulación académica"".

N'Asturies la principal causa d'abandonu ye'l propiu fracasu nel llogru del títulu de la ESO pa lo que la Conseyería d'Educación y Ciencia del Principáu xunto col Ministeriu d'Educación crearen una observatoriu que se prevé va tar en marcha col entamu del cursu académicu 2009-2010, según informó García-Riestra.

El director xeneral de Polítiques Educatives cree que la crisis pue estimular a la población xuvenil qu'abandonó los estudios o la población adulta a recuperalos, pa revalorizar la so cualificación. ""Tamos detectando un incrementu de la demanda d'estudios d'adultos"", declaró.

Pa Luis Enrique García-Riestra los profesores faen un esfuerzu diariu porque los sos alumnos estudien y aprueben. ""Nesi sen el compromisu del profesoráu ye total"", afirmó."