La Conseyería de Mediu Ambiente d'Asturies dedicará 200 millones d'euros a carreteres

"El conseyeru de Mediu Ambiente, Ordenación del Territoriu y Infraestructures, Francisco González Buendía, presentó güei los presupuestos previstos pal so departamentu nos que destaquen los cerca de 200 millones d'euros destinaos a la construcción de carreteres.

Buendía señaló que los 200 millones suponen una cuantía ""mui importante"" y la más alta dende'l 2001. ""Van poder entamase grandes obres"", dixo nesti sen na rueda prensa que compartió col conseyeru de Mediu Rural y Pesca, Aurelio Martín.

El presupuestu de la Conseyería sube a 365,14 millones d'euros, lo que supón un crecimientu del 13,54 por cientu sobre l'añu pasáu. Crez tamién l'área de Mediu Ambiente, n'especial pa les dotaciones pa obres de sanianmientu a les que van destinase más de 70 millones d'euros.

Ente los oxetivos pal próximu exerciciu ta caltener l'actividá económica y el puxu a la obra pública, pa lo que va destinase una inversión de 284 millones d'euros. De la mesma manera, van poder ponese en marcha actuaciones por importe superior a 316 millones d'euros --financiaes con cargu a los fondos mineros-- como'l desdoblamientu de los túneles de Riañu; la carretera Bárzana'l Monestieru-La Puela Allande, o los accesos a nuevo HUCA y Soto Ribera ente otros.

Van sacase a axudicación les concesiones de l'AS-III (Avilés-Llanera) y los accesos a la Zalia por importe superior a los 360 millones d'euros. Tamién apuntó que van executase 30 nueves 'carreteres sociales' que son pequeñes en llargor y presupuestu pero que son un ""serviciu fundamental"" pa los vecinos, señaló.

Buendía calcó tamién nes actuaciones previstes en materia portuaria y tresportes. Destacó la segunda fase de les obres del puertu de Lluanco, el refuerzu del dique de Llanes o l'ampliación de les mariñes deportives de Ribesella y Llanes; asina como los 2,75 millones pa la nueva estación d'autobuses de Navia, la rede d'aparcamientos y l'estudiu pa la construcción del 'tren-tran' pal área central.

N'urbanismu, el departamentu de Buendía dobla'l so presupuestu y algama los 6,31 millones d'euros pa dar continuidá a les actuaciones rellacionaes al Plan d'Ordenación del Llitoral d'Asturies (POLA), les ayudes a los planiamientos urbanísticos y al Concursu Internacional d'idees de 'El Cristo-Buenavista', que va disponer de 245.000 euros.

A lo último, el conseyeru esplicó les inversiones y actuaciones previstes en materia de Mediu Ambiente. Buendía indicó que xunto a los más de 70 millones pa saniamientu, la proteición y meyora del Mediu Ambiente va contar con 10,8 millones d'euros.

Los proyeutos de sendes peatonales, con especial atención a l'actuación de recuperación ambiental de los marxes de la ría d'Avilés (1,2 millones), y les ayudes a conceyos pa la proteición d'espacios naturales, xunto coles actuaciones n'espacios protexíos, árees d'importancia internacional o parques naturales, son otres de les llinies d'especial interés de la Conseyería. Ente elles, destaquen la execución del proyeutu de la Casa del Gallu Montés de Tarna y la dotación espositiva del Centru d'Interpretación de la Reserva de la Biosfera EO-Ozcos-Terras de Burón."