Asturies va acoyer el tercer Congresu Nacional d’Ecoturismu, que se va celebrar en Cangas del Narcea en payares

La Reserva de la Biosfera Muniel.los-Fontes del Narcea va ser la sede del congresu que se va celebrar del 13 al 15 de payares.

El conseyeru d’Empléu, Industria y Turismu, Isaac Pola, xunto a la secretaria d’Estáu de Turismu, Isabel Oliver, presentaron güei na Feria Internacional de Muestres d’Asturies (Fidma) el simposiu, que busca impulsar el turismu de naturaleza que prima la sostenibilidá, el caltenimientu de la contornada y l’apreciu del mediu natural, como un productu estratéxicu y prioritariu pol so potencial tan grande como factor de desenvolvimientu socioeconómicu. La so celebración na seronda ayuda, amás, a desestacionalizar el sector.

El congresu va incluyir delles ponencies y meses redondes sobre cuatro asuntos: la normativa rellacionada coles actividaes de naturaleza, la creación d’esperiencies vinculaes a esti tipu de turismu y la so promoción a nivel nacional y internacional, la comercialización del productu y la formación y titulaciones d’ecoturismu. Pa tratar estos asuntos, va cuntase con representantes d’alministraciones, empreses, turoperadores y entidaes dedicaes al caltenimientu del mediu natural.

Tamién va haber un espaciu pa favorecer l’intercambéu d’esperiencies empresariales, amás d’una zona de trabayu pa que los grupos de desenvolvimientu rural analicen posibles proyectos de cooperación y evalúen los planes en marcha. Amás, ta prevista l’asistencia de turoperadores internacionales especializaos n’ecoturismu y la programación de salíes pa conocer la zona.

 Modelu de desenvolvimientu sostenible

“La elección d’Asturies como sede del congresu ye un honor y una reconocencia a una estratexa de desenvolvimientu territorial na que la sostenibilidá siempre tuvo presente y a un modelu que fixo de la participación y la collaboración la so filosofía de trabayu”, destacó Pola. Tamién se refirió al Programa de Turismu Sostenible 2020, que recueye como ún de los sos nueve productos prioritarios el turismu de naturaleza y, dientro d’ésti, l’ecoturismu.

Pal conseyeru, trátase d’un sector estratéxicu pol so potencial tan escomanáu pa convertir el Principáu nun destín líder, porque dispón de recursos pa impulsar esti tipu de turismu. “La nuestra xeografía fai posible la práctica d’una gran variedá d’actividaes deportives d’altu y mediu monte, lo mesmo que de costa y agua interiore, y los niveles de caltenimientu y protección del mediu ambiente faen posible’l caltenimientu de delles especies de flora y fauna”, indicó.

A esto súmase la ufierta de servicios con que cunta Asturies, onde hai anguaño más de 200 empreses de turismu activu y deportivu, 82 d’elles especializaes n’actividaes rellacionaes col monte. La comunidá rexistró una puxanza importante del turismu rural, con más de 1.800 agospedamientos y una medría del 23 % nel 2017.

El titular d’Empléu recordó que va dos meses Asturies foi sede del Congresu Mundial de Destinos Turísticos Intelixentes, onde la sostenibilidá tamién foi l’elementu central. “La celebración d’estos dos congresos na mesma comunidá autónoma ye, al mio xuiciu, toa una declaración d’intenciones y una oportunidá fantástica pa reforzar una posición de lideratu”, aseguró.

Al actu celebráu na Fidma asistieron tamién la representante del Club d’Ecoturismu d’España y presidenta de l’Asociación de Turismu Rural Fontes del Narcea, Ana Llano; la conceyala de Turismu de Cangas del Narcea, Begoña Cueto, y el director xeneral de Comerciu y Turismu, Julio González Zapico.