Esther Manzano cocina pa los ingresaos en Cabueñes pa celebrar el cincuentenu aniversariu del hospital

La cocinera con una estrella Michelin Esther Manzano ellaboró un menú especial con productos asturianos esti martes pa celebrar el mediu sieglu de vida del Hospital de Cabueñes. Los ingresaos con una dieta normal, visitantes y personal pudieron disfrutalu.

La responsable de La Salgar cocinó, col asesoramientu del Serviciu d'Endocrinoloxía, ensalada de bonitu escabecháu, carrellera con puré de pataca y encurtíos, y tarta de quesu con lasques de parmesanu y frutos coloraos. A les persones diabéticas que precisen alimentos fáciles de mazcar preparóse-yos una variante del menú qu'inclúi crema de garbanzos acompañada d'ensalada o macedonia de fruta con mueyu de naranxa.

La iniciativa pretende facer partes de la celebración del aniversariu de Cabueñes a los pacientes hospitalizaos, con un menú de calidá, saludable y que tien como base productos típicos del país. Tamién se sirve na cafetería del centru pa que puedan tastialo visitantes y profesionales.

D’igual, esta xornada val pa que’l equipu de cocina del hospital reciba formación en distintes téuniques culinaries emplegaes por Manzano, que va poder aplicar darréu na ellaboración de próximos menús y nel so trabayu diariu.

Na semeya, Manzano a la derecha mientres prepara una bandexa col menú especial.