“La idea ye llevar un chigre asturianu a Lorient y mostrar la meyor cara d’Asturies”, apunta Chus Rodríguez Álvarez

El pabellón d’Asturies nel Festival Interceltique de Lorient ta ultimando los preparativos p’acoyer dende’l vienres a miles de visitantes. “La idea ye llevar un chigre asturianu a Lorient y mostrar la meyor cara d’Asturies”, apunta’l so responsable Chus Adrián Rodríguez Álvarez, que recupera l’espaciu del país nel certame.

Tres un añu d’ausencia, Asturies torna a tener un espaciu na Quai des Pays Celtes. El que fora camareru y encargáu del pabellón asturianu n’años pasaos cola empresa anterior, Rodríguez Álvarez, aventuróse en solitariu nesta ocasión col oxetivu de que’l país siga teniendo un escaparate n’An Oriant, llugar que yera pasu obligáu de bretones y visitantes nes dos décades últimes.

“La idea ye llevar un chigre asturianu a Lorient y mostrar la meyor cara d’Asturies”, esplica Rodríguez Álvarez, que llevó hasta Breizh un equipu conformáu por Laura González, Ruth Álvarez, Javi López, Fernando Llaneza y Rubén Alonso, amás del cocineru Mirko Sanfratello, que presenta como platos estrella la fabada, el chorizu a la sidra y los garbanzos con espinaques y bacaláu. Too ello bañao con sidra “d’un llagar pequeñu como Contrueces”, oruxos o la cerveza artesano Scone.

“La calidá ye lo primero, polo que priorizamos la calidá de los productos y el bon serviciu”, espresa’l responsables del pabellón asturianu consciente de la importancia que tien esti espaciu “pa la imaxe d’Asturies y como reclamu pal tuismu”. Por ello, la decoración del pabellón va contar con pieces de madera antiguu, de 150 años, de Pereda, artesanu del Berrón, y incorpora visuales producíos a costafecha por Turismu d’Asturies, que tamién va contar con un puestu nel llugar.

Importancia de lo musical

Nun festival que xira al rodiu la música, una programación acordies ye básica nun pabellón que pretende ser cabezaleru como l’asturianu. Asina, Melandru, banda de rock esperimental en llingua asturiana, va ser el grupu residente, presentando pa ello un formatu más tradicional

D’igual forma, hai que sumar ambientación musical diaria de tradición asturiana de 17 hores a medianueche. La collaboración de Nicolas Radin, del espaciu bretón, ye básica pa la so producción nel chigre d’Asturies.

A falta d’últimos detalles, el pabellón yá ta preparáu p’acoyer dende mañana a los primeros veceros. Mientres, la delegación asturiana parte esta nueche n’autocar hasta An Oriant pa convertir, un añu más, a Asturies nun referente nel festival celta más importante del mundu, qu’esti añu va tar dedicáu a Cymru.