Asturies recibe del Estáu 2,8 millones d'euros pa lluchar contra la violencia machista

El Gobiernu va repartir esta partida en dellos proyeutos en base a cuatro llinies d'actuación.

La Conferencia Sectorial d'Igualdá desbloquió ayeri los fondos asignaos al Pautu d'Estáu contra la Violencia de les Muyeres y va apurrir al Gobiernu asturianu 2.878.712 euros p'avanzar na llucha contra les agresiones machistes y l'atención, sofitu y asesoramientu a les víctimes y los sos fíos. En total, l'Executivu estatal reparte 100 millones ente les comunidaes autónomes.

Pa la distribución de los fondos túvose en cuenta'l componente demográficu. Asina, de los casi 2,9 millones que recibe Asturies, más de 1,2 asignáronse según criterios de dispersión y población rural.

Tres conocer la llegada de les perres, el Gobiernu ta trabayando en definir los proyeutos concretos que se van financiar con estos fondos y que se van repartir en cuatro llinies d'actuación: l'impulsu a les unidaes de valoración forense integral; el refuerzu de los centros asesores de la muyer, con ameyoramientos na fase d'acompañamientu a les víctimes; el desenvolvimientu del Protocolu d'Agresiones Sexuales pa l'atención y prevención dende un enfoque integral; y la promoción de les campañes de sensibilización.

300.000 euros pa l'atención de les víctimes

Dientro de los alcuerdos aprobaos pola Conferencia Sectorial d'Igualdá inclúise la partida de fondos pa l'atención a les víctimes, de los qu'Asturies va recibir 311.000 euros. En concreto, l'Estáu va apurrir 175.159 euros pal desenvolvimientu de programes y la prestación de servicios que garanticen el derechu a l'asistencia social integral a les víctimes de violencia de xéneru y otros 42.734 euros empobinaos a l'atención especializada a menores d'edá na mesma situación.

Coles mesmes, el Fondu pa Programes pal Sofitu a Víctimes d'Agresiones y/o Abusos Sexuales asignó 94.000 euros a Asturies, que se comprometió a unviar los proyeutos lo más pronto posible pa que na primer selmana de setiembre tol procesu tea rematáu y los fondos tean dispuestos pal so usu.