El Gobiernu afita los planes d’estudios del grau superior de gaita

El cursu viniente l’enseñu de gaita va contar con un grau superior, al mesmu nivel que cualquier grau universitariu. El Conseyu de Gobiernu aprobó la modificación del decretu de les enseñances artístiques superiores de música, qu’afita los planes d’estudiu.

En xineru dábase anuncia d’esti pasu lóxicu pa dar continuidá a estos estudios, qu’hasta agora teníen namái enseñu elemental y profesional. Asina, va constar de cuatro cursos más, hasta completar 14, que se van impartir n’Uviéu, nel Conservatoriu Superior de Música Eduardo Martínez Torner, baxo’l nome de ‘Instrumentos de la Música Tradicional y Popular d’Asturies’.

La modificación del decretu 46/2014, del 14 de mayu, “garantiza la continuidá de la formación musical, con un itinerariu nuevu, pal alumnáu que superara les enseñances profesionales d’esti instrumentu, especialmente venceyáu a la tradición asturiana”, apunten dende’l Gobiernu. “Da respuesta a una demanda social, plantegada dende sectores artísticos y académicos”, añaden, al empar que protexe’l patrimoniu nacional y el fomentu del so conocimientu.