Quini súmase a la campaña "Doi la cara pola Oficialidá" del CAO

"El míticu exfutbolista del Sporting de Xixón y del F. C. Barcelona y actual delegáu del club xixonés, Enrique Castro "Quini", acaba sumase a la campaña "Doi la cara pola Oficialidá" entamada pol Conceyu Abiertu pola Oficialidá. Esti nuevu apoyu súmase al d'otros asturianos conocíos como'l futbolista David Villa o'l músicu Jose Ángel Hevia y al de más d'ocho mil persones que yá se retrataron nesta campaña.

Según los responsables del CAO ""cuando se trespasa la cifra de 8.000 retratos y depués de contar cola participación de xente anónimo amás de la de munchos y munches representantes del mundu de la cultura y de la política, el míticu delanteru vien a sumase, como ún más, a esta llarga galería de persones que tienen claro que la oficialidá ye la única solución que val pa que l'idioma asturianu nun muerra abandonáu a les polítiques de pega, a les soluciones cosmétiques o a los aplazamientos que la faen retroceder día tres día en cuenta de revitalizase como llingua n'igualdá de condiciones col castellanu"".

Asimesmo'l portavoz del CAO, Fernando Ornosa, dixo que ""l'éxitu d'esta campaña ye una respuesta clara a les intenciones de la FSA y del PP d'acabar col asturianu a mediu plazu. Con esta forma orixinal de movilización vamos siguir buscando'l consensu y la participación de tola sociedá. D'equí a poco vamos empezar a recorrer Asturies: nun vamos dexar conceyu ensin la visita del CAO, pa que tol que quiera faiga la semeya y algamar con ello un númberu d'adhesiones muncho mayor del que yá hai. Con esti trabayu, dende'l CAO siguimos reclamando un estatutu que recueya nel so articuláu l'estaus d'oficialidá pa la nuestra llingua, primer pegollu necesariu pa que'l futuru del idioma tea aseguráu""."