“La nueche del Intercélticu de Llan de Cubel y los escoceses Dallahan promete ser espectacular”, anuncia Casas

El XXII Festival Intercélticu d’Avilés y Comarca da un xiru pa dar más protagonismu a los conciertos folk. “La nueche de Llan de Cubel y Dallahan promete ser espectacular”, anuncia Juan Luis Casas, presidente d’Esbardu, anque nun va ser la única, yá que’l certame va trayer tamién a Dixebra, Spanta la Xente o Caldo y Os Rabizos.

Toles nueches, del llunes al sábadu, va haber una actuación de grupos folk na esplanada de La Esposición. “L’añu pasáu batimos el récor de participación de bandes de gaites y grupos de bailles, y pa esta edición pensamos en dar una vuelta y programar más conciertos folk”, esplica Casas.

La fin de selmana va acoyer les dos cites de más sonadía. El vienres 27 los aficionaos al folk-rock van poder disfrutar de Spanta la Xente y los llocales Dixebra, mentes que’l sábadu 28 tán programaos Llan de Cubel y Dallahan, qu’actúa per primer vegada nel país.

“La nueche del Intercélticu de Llan de Cubel y los escoceses Dallahan promete ser espectacular. Llan de Cubel ye un grupu históricu que nun se dexa ver muncho y Dallahan ye una banda moza mui bona que ta dando muncho que falar n’Escocia”, esplica’l presidente d’Esbardu, organizadora del eventu, que tampoco nun escaez la nueche del vienres, “na qu’esperamos a muncha xente”.

Xunto a estes cuatro bandes, tamién van pasar pel escenariu avilesín Tsarigando y el grupu Lugh, nacíu en Patagonia, el llunes; Caldo y Os Rabizos, pa siguir una folixa de temática irlandesa, el martes; l’espectáculu de danza y música irlandesa Riverdance Celtic Storm col grupu Ards Comhaltas Ceoltori Eireann y una folixa de temática escocesa, el miércoles; y Tuenda y una folixa de temática gallega, el xueves. A ellos hai que sumar la participación nel Intercélticu de les bandes de gaites Methil & District (Alba), A Carballeira (Galicia) y Esbardu, col so cuerpu de baille.

“La intención ye que la xente que s’avere a Avilés pueda disfrutar del Intercélticu mientres tol día. Pela mañana coles esposiciones, llueu cola animación peles cais y de nueche colos conciertos y monográficos de países celtes”, apunta Casas, que tamién fai referencia al espaciu dedicáu a los productos asturianos, como la preba de cerveces artesanes del llunes a les 19 hores. Amás, el festival programa tamién actividaes en Pravia y Corvera.

Banquete celta, la novedá

El domingu, xornada d’apertura del Intercélticu, que s’allarga hasta’l domingu siguiente, va celebrase un banquete celta, novedá principal de la edición d’esti añu. El menú tien un costu de 25 euros y consta d’asáu de gochu asturcelta, empanada de bacalao con pases, ensalada de llechuga y tomate, llambionada de quesu y arándanos, quesu San Simón ‘Daniberto’ y pan, con agua y vinu como bébora, amás d’una ‘poción máxica’.

“Yá superamos los 65 apuntaos, que van venir carautizaos, una de les condiciones pa poder participar, anque sía parcialmente”, destaca Casas, qu’añade que “la xente ta mui ilusionao con esta iniciativa qu’esperamos repitir n’años próximos”. Pa poder participar nel banquete, que va comenzar a les 20.30 hores y va contar cola actuación en direuto de Lugh, ye necesario acutar plaza enantes, con plazu hasta esta medianueche.