Los ganaderos en zones de proteición nun van necesitar seguru de recoyida de cadabres

Les especies necrófagues van poder asina alimentase tres nun tener los efeutos esperaos la resolución de mayu del 2017.

La Conseyería de Desarrollu Rural y Recursos Naturales espublizó'l martes una resolución nel Boletín Oficial del Principáu d'Asturies (BOPA) que permite a los ganaderos dexar los animales muertos nes camperes allugaes nes zones de proteición p’alimentar a especies necrófagues. D'esta forma desaníciase la obligación de les esplotaciones agraries de disponer d'un seguru de recoyida de cadabres neses árees.

Pa modificar la normativa, la conseyería tuvo en cuenta l'alimentación de les especies necrófagues, según la demanda de los ganaderos p'apangar los daños causaos presuntamente por esti tipu de fauna. Per aciu d'una resolución del 25 de mayu del 2017, Desarrollu Rural declaró diverses zones de proteición pa l'alimentación d'especies necrófagues d'interés comuñal n'Asturies y afitó tamién los requisitos específicos pa nun tener que retirar los animales muertos mientres el pastoréu nesos terrenos, pero al nun tener l'efeutu esperáu fai esta rectificación pa facilitar l'usu de cadabres pa l'alimentación nestos llugares.

Poro, la resolución espublizada recién modifica l'anterior y desanicia esti requisitu, calteniendo les condiciones restantes de les establecíes p'asegurar l'usu seguru d'estos subproductos na alimentación de les especies monteses.