Mediu Rural anuncia la creación d'un Conseyu Asesor Agrariu del que van formar parte los sindicatos

"La Conseyería de Mediu Rural va crear un Conseyu Asesor Agariu nel que van tar representaos los sindicatos del sector, col fin d'afrontar los problemes qu'afeuten al mundu del campu. La intención del responsable de la cartera, Aurelio Martín, ye presentar el borrador d'esti organismu nun plazu d'un mes a les tres centrales mayoritaries pa consensuar el documentu.

Asina lo anunció güei'l conseyeru en declaraciones a los medios de comunicación, tres caltener un primer conceyu de toma de contautu colos tres secretarios xenerales de les tres principales centrales sindicales agraries: Ramón Artime (Asaja), José Calvo (UCA) y Óscar Sirgo (COAG).

""Quisimos que los sindiatos agrarios formen parte, non del nuesu equipu, pero sí parte d'esta pata de bancu imprescindible pa que'l sector del campu tenga futuru"", esplicó'l conseyeru. ""Tresmití-yos la mio decisión de collaborar de manera estable y permanente con ellos, y la intención de crear un Conseyu Asesor Agrariu, nel que la participación del sector tea regulada"".

Martínez esplicó que tovía nun hai una asignación económica nin hai una decisión sobre quién va tar representáu nesi conseyu. Espera tener el borrador nun mes pa consensualu colos sindicatos, enantes de unvialu al Conseyu de Gobiernu del Principáu pa la so aprobación. Reconoció sicasí, que nun van ""inventar la pólvora"", porque yá existen conseyos d'esti tipu n'otres comunidaes autónomes.

De momentu, y ""mientres esi conseyu nun se cree"", van facese conceyos periódicos pa ver toos y caún de los problemes qu'afeuten al sector, añadió'l conseyeru.

Señaló tamién otros temes de relevancia que se trataron nel alcuentru, como la reforma de la Política Agraria Común o la llingua azul. Sobre esti últimu tema, Martín prevé qu'a 31 d'avientu tea completa la primer vacunación. ""Agora mesmo, pue tar en niveles al 80% y pensamos que l'oxetivu de qu'a 31 d'avientu tea acabada ye posible"", añadió.

ARTIME DIZ QUE'L CONSEYU ""SUENA BIEN""

El secretariu xeneral d'Asaja, Ramón Artime, reconoció que-y ""suena bien"" la creación d'esi Conseyu Asesor, pero s'entruga ""quién va tar nél"". ""Lo que ta claro ye que les organizaicones nun vamos ceder nin un centímetru del espaciu que mos correspuenden en favor d'otru tipu d'asociaciones"", anunció.

Polo demás, espresó'l so deséu de que ""se pongan a trabayar pa buscar solcuiones a tolos problemes que tenemos sobre la mesa, que nun son pocos"". Per otra parte, en rellación col anunciu d'ayudes de cuota llechera, recordó que ""la cuestión va tar en saber cómo va repartise esi dineru"", porque al so xuiciu, ""hai que contar coles asociaciones agraries, d'Asturies y de toa España"".

Sirgo consisera que'l conseyeru ""entamó distinto a l'anterior conseyera, con esi xestu d'aconceyase con tolos sindicatos, y esperemos que continúe asina y que siga trabayando"". ""Vamos apoyalu en tolo que seya diálogu, y enfrentase a los problemes del sector, pero de cara"", apuntó.

Pela so parte, Calvo cree que'l fechu de que ""la so primer iniciativa seya aconceyase colos sindicatos agrarios ye positivu, pero hai que ver a lo llargo del tiempu si esto que se tenta de poner en práctica güei sigue""."