Asturies collabora na busca de familiares de combatientes republicanos enterraos en Cantabria

L’apaición d’un llibru de rexistru parroquial na población cántabra de Limpias permitió conocer la identidá de 74 combatientes republicanos enterraos nuna fosa común del cementeriu llocal. D’ellos al menos nueve son asturianos y Xusticia ta collaborando na busca de los sos familiares pa informa-yos del afayu.

Foi l’enfotu de José Antonio Larrinoa na busca del destín del so tíu Juan Larrinoa Arza’l que permitió l’añu pasáu dar con esti descubrimientu. Tres percorrer cantidá de pueblos, foi en Limpias, na parroquia de San Pedro, onde por fin conoció lo qu’asocedió realmente col so familiar y ónde tán los sos restos.

Un llibru de rexistru parroquial escondíu ente los volúmenes de bautizos y matrimonio dio cola respueta. Nél se rellataba la muerte, la fecha y el motivu de la muerte de 74 combatieintes republicaos que reposen nuna fosa común, ente ellos al menos nueve asturianos: Juan Vento Silda, Nicolás Álvarez López, Arcadio Rodríguez Valero, Antonio Puerta Sánchez, Amalio Hevia García, Adolfo Mejida García, José Diéguez Álvarez, Valentín Rodríguez Cantaneli y Luis Acebal Muñiz.

El Gobiernu collabora agora na llocalización de los so familiares al traviés de la Direición Xeneral de Xusticia, que yá se punxo en contactu con asociaciones asturianes de memoria histórica y cola Universidá d'Uviéu pa conocer si disponen de datos sobre estes persones y los sos familiares. Tamién fixo indagaciones nel Rexistru civil.

L'oxetivu ye alcontrar a les families de los combatientes soterraos en Cantabria y informa-yos del afayu, en casu de que desconocieren esti fechu, asina como tresllada-yos qu'a finales de setiembre va celebrase un homenaxe en Limpias al que van asistir representantes de los gobiernos d'Asturies, Cantabria y el Euskadi, y va instalase una placa conmemorativa nel campusantu municipal. Pa solicitar información o dar cualquier datu, les persones interesaes pueden contautar con Xusticia al traviés del númberu de teléfonu 985.66.85.12 o nel corréu electrónicu dgjusticia@asturias.org.

Na imaxe, parroquia de San Pedro. Semeya propiedá del Ayuntamiento de Limpias.