Dimas García ve "acertao" nomar a Madiedo anque espera que nun apoye les tesis del padre sobre ampliaciones portuaries

"El presidente de la Federación Asturiana de Cofradíes, Dimas García, consideró güei ""una decisión acertada"" el nomamientu de José Antonio Madiedo Piñera como nuevu director xeneral de Pesca, per parte del nuevu conseyeru de Mediu Rural y Pesca, Aurelio Martín, qu'asumió'l cargu pol reciente acuerdu de Gobiernu autonómicu ente la so formación y el PSOE. Sicasí, el representante de los marineros mostró'l so deséu de que nun apoye la tesis del so padre, José Antonio Madiedo Acosta.

En declaraciones a Europa Press, Dimas García recordaba asina les opiniones d'esti últimu, presidente de l'Asociación de Marina Civil. N'abondos artículos, mostróse críticu cola situación de los muelles n'Asturies y les obres d'ampliación desarrollaes en munchos d'ellos, a les que se refirió como ""colonización del formigón"".

García almitió nun conocer al nuevu director, anque consideró positivu'l fechu de que provenga d'una familia ""rellacionada"" col mar, y ofreció tol apoyu de la entidá a la que representa demientres la so xestión. Sicasí, trató de dexar claro que ""güei en día los muelles tienen de ser de formigón"".

Ente los temes de más urxencies, sobre los que García pretende que Madiedo se ponga a trabayar, señaló la parada obligatoria de la pesca de la merluza y el llagostín. Mostró'l so deséu de que'l nuevu director medie ante'l Ministeriu d'Agricultura y Pesca p'algamar qu'a los barcos afeutaos pola midida se-yos permita pescar otru tipu de productu demientres el tiempu de vixencia de la norma.

Pela so parte, el patrón mayor de la Cofradía de Pescadores Virxen de les Marees d'Avilés, Gregorio López, tamién ofreció la so total ""collaboración pa trabayar"", col nuevu director."