Iniciativa pol Asturianu va tornar a la FIDMA

El coleutivu da espaciu nel so puestu a empreses qu'empleguen l'idioma.

Per segundu añu, tres la bona esperiencia de la edición pasada, Iniciativa pol Asturianu va contar con un espaciu propiu na popular Feria Internacional de Muestres d'Asturies (FIDMA) que se va celebrar nel Recintu Ferial Luis Adaro del 4 al 19 d'agostu. Nella, amás de dar a conocer a l'asociación, va haber espaciu pa empreses comprometíes pa cola llingua asturiana.

Ediciones Trabe, Saltadera, Pintar-Pintar, Trebeyos, Miguina de Pan y CuatroGotes Producciones tuvieron presencia nel puestu l'añu pasáu, algamando numberoses ventes y repercusión. Amás, pel mesmu pasaron cargos de toles fuercies polítiques a esceición del Partido Popular (PP), incluyíu'l presidente Javier Fernández, que dexó pa la historia un “hacéis bien, joder" como respuesta a un “tenemos que volver a reclama-y la oficialidá una vez más” d'Inaciu Galán, presidente d'Iniciativa pol Asturianu.