Ciudadanos considera una "restricción de derechos" que l'Ayuntamientu de Xixón use los topónimos n'asturianu

"La Federación Norte de Ciudadanos-Partíu de la Ciudadanía fizo públicu güei un comunicáu nel que denunció que'l Conceyu de Xixón obliga a los sos funcionarios a utilizar la ""toponimia asturiana"". Según espunxo la formación, l'Ayuntamientu ""exixe l'usu d'estos términos y pide a los sos trabayadores la tramitación únicamente de los espedientes que cumplan esta condición"".

Ciudadanos entiende qu'esto ""nun dexa de ser la copia de comportamientos absurdos que se dan n'otres Comunidaes Autónomes con mayor repercusión mediática, pero con igual grau d'irracionalidá"".

Consideren, de la mesma manera un ""error políticu"" la midida, na llinia en que ye ""una iniciativa que restrinxe los derechos individuales a la vez que trata d'imponer na sociedá asturiana comportamientos que nun son comunes"".

""Llamentamos fonderamente que'l Partíu Socialista tea más pendiente de crear realidaes d'artificiu que de los verdaderos problemes qu'afeuten a los ciudadanos"", añade'l comunicáu.

Nesti casu, Ciudadanos destacó la gravedá de que'l Partíu Socialista nun cuenta con presiones nacionalistes tal y como pasa n'otros llugares como Cataluña, Galicia o hasta Lleón, sinón que la iniciativa provién directamente de l'alcaldesa, Paz Fernández Felgueroso, qu'hasta anima a que nun se tramiten los espedientes rellenaos en castellán.

Ciudadanos pide al equipu de Gobiernu municipal que revoque la instrucción firmada pola rexidora y que busque'l progresu en polítiques d'avance social y nun na copia de comportamientos reaicionarios nada propios de quien se denomina socialista."