El Principáu prevé abrir la próxima selmana'l sentíu Xixón-Mieres de l'Autovía Minera

"L'Autovía Minera va siguir cortada polo menos hasta la próxima selmana, y la previsión ye que pa entós s'abra al tráficu'l so sentíu Xixón-Mieres, tres lo que van entamar los trabayos de llimpieza y estabilización nos carriles contrarios. Nun hai fecha estimada pa l'abertura total de la vía.

Asina lo anunció güei'l director xeneral de Carreteres, José María Pertierra, demientres una rueda prensa convocada pa informar sobre l'estáu de les comunicaciones terrestres asturianes, tres la serie d'argayos que tuvieron llugar demientres esta selmana, ún de los cuales obligó a pesllar el tráficu AS-I, qu'enllaza Xixón y Mieres, a l'altura del conceyu de Llangréu.

Según esplicó Pertierra, los trabayos que se tán desarrollando nesta vía de comunicación céntrense en reforzar la lladera afeutada pol corrimientu sobre la marxe derecha, en sentíu Xixón-Mieres. Una vez qu'esta parte tea asegurada, va abrise al tráficu esti sentíu y van entamase los trabayos nos carriles contrarios de l'autovía. ""La selmana que vien a ver si podemos abrir ún de los tubos"", estimó'l director xeneral de Carreteres, que pese a los problemes señalaos considera ""segura dafechu"" esta ruta.

""BAXA INCIDENCIA"" D'ARGAYOS

El responsable consideró los argayos un ""problema consustancial"" da les característiques orográfiques y climátiques del territoriu asturianu, y poro dalgo colo que ""hai que convivir"". Nesti sen presentó unos datos que dende'l so puntu de vista, demuestren un ""ratio d'incidencia baxu"".

Según Pertierra, na última selmana se produxeron argayos en 43 de les 473 carreteres asturianes, ""menos del 10%"", afirmó. Esplicó amás que nestes 43 carreteres se produxeron 77 problemes de desestabilización, de los que ""74 yá quedaron resueltos"", y sólo queden tres por solucionar: el mencionáu de l'AS-I, l'argayu de la carretera de Balmonte a Auguasmestas, que causó la muerte a un conductor y el de la carretera de Pandenes.

Nel casu de Balmonte, se produxo por una filtración pola acumulación de mases d'agua que provocó la desestabilización de la lladera. ""La selmana que vien podremos valorar abrir la carretera al tráficu d'una manera llibre y ensin caltenela cortada n'hores nocherniegues"", matizó Pertierra. Dempués de saniar el llugar, van colocase unes pantalles dinámiques que protexan la cayida y desestabilización de la parte superior de la lladera, asina como meyorar el drenaxe con una cuneta perimetral de la cabeza d'esi desmonte.

El director destacó poro ""l'axilidá"" de l'Alministración a la hora de ""resolver estos incidentes"". Esplicó que la Direición Xeneral de Carreteres cuenta con 288 operarios repartíos en nueve árees xeográfiques. Cada celador de les mesmes ye comunicáu de los problemes pol Centru de carreteres de La Morgal. ""El llabor d'estos medios demientres esta selmana foi digna de reconocencia"", matizó.

Señaló amás que la ""seguridá absoluta n'obra civil"" nun existe, polos ""factores medioambientales"". Trató de dexar claro que nes obres d'infraestructures n'Asturies ""nun s'improvisa"" y que ""detrás de cada proyeutu de carreteres hai inxenieros de caminos, topógrafos y xeólogos que calculen el perfil d'equilibriu col grau d'análisis y certeza necesariu"". ""Aventurar esto con seguridá ye imposible"", sentenció.

EL VENTANÍN, DE RESPONSABILIDÁ MUNICIPAL

Sobre l'argayu producíu na zona d'El Ventanín, n'Olloniego, conceyu d'Uviéu, afirmó que ""esi problema nun compete al Principáu"". Criticó que se confunda ""dominiu públicu con titularidá pública"" y recordó que nesi casu la titularidá ye del Conceyu."