CC OO alerta d’una mengua nes previsiones de necesidaes docentes pa la materia de Llingua Asturiana

Maestros y equipos direutivos de dellos centros tresmitieron quexes al Sindicatu d’Enseñanza de Comisiones Obreres (CC OO) tres conocer la previsión de places vacantes pa la materia de Llingua Asturiana. Denuncia la mengua inxustificada d’hores d’asturianu.

D’acordies colos datos recoyíos pol sindicatu, el númberu de places a xornada completa a les que va poder optar el profesoráu interino d’esta asignatura na próxima axudicación desciende casi nun terciu con respeuto al cursu actual. Siguiendo la tendencia de los últimos años, munches de les places completes esistentes esti cursu contémplense na previsión de necesidaes docentes como medies xornaes”, espliquen dende’l sindicatu, qu’añade que “la rebaxa nel cálculu d’hores de Llingua Asturiana en bien de casos nun coincide coles estimaciones realizaes nos centros educativos”.

Asina, esplica que n’Infantil nun se tuvieron en cuenta les hores d’esta etapa nin el criteriu de los equipos directivos que pidíen el caltenimientu d’una plaza completa de Llingua Asturiana col envís de cubrir delles necesidaes del centru, poniendo l’exemplu del CRA de La Espina, “onde la docente d’esta asignatura vien realizando funciones de coordinación”. Nos institutos, mentes, el cálculu de necesidaes de los institutos básase nes hores de la ESO, “descartando la posibilidá de que la materia puedan escoyela estudiantes de Bachilleratu”.

Mientres, en dellos centros, como’l CEPA d’Uviéu, axúntase al alumnáu de niveles estremaos, reduciendo’l númberu d’hores llectives asignaes a la materia. “Too apunta hacia una planificación fecha a partir de datos provisionales, con criterios economicistes, que rebaxa les espeutatives de matrícula de los centros col aquel d’acomodar la previsión de necesidaes docentes a contratos a tiempu parcial”, apunta, pa depués añadir qu’en dalgún casu, como l’IES de Tinéu, “estremáronse les hores d’asturianu en dos medies xornaes, ampliándose una d’elles a xornada completa col amiestu d’hores de Lengua Castellana”.

Condenaos a la interinidá

Esta situación empeora entovía más les condiciones llaborales de los docentes de Llingua Asturiana, “un coleutivu formáu mayoritariamente por profesoráu interino que davezu vese obligáu a solicitar el so puestu trabayu ensin saber cuál va ser el númberu real d’hores llectives qu’habrá dar, lo que tien consecuencies patentes sobre’l salariu”. A ello hai que sumar l’ausencia de la especialidá docente, qu’impide a los maestros algamar la condición de funcionarios.

Por too los espuesto, CC OO reclama a la Conseyería d’Educación y Cultura “que la previsión de necesidaes docentes se faiga a partir de datos reales, faciendo un sondéu de matrícula enantes de terminar el cursu, pa evitar los perxuicios que se vienen causando al profesoráu interín de Llingua Asturiana, y garantizando, al mesmu tiempu, el derechu del alumnáu a estudiar la materia en tolos niveles de la enseñanza reglada”.